Nongpoh, Nailur 23: Ka Seng Hynñiewtrep Youth Council (HYC), Ri Bhoi District ha ka jingïalam u General Secretary, u Samla Shemphang Masharing lem ha ka jingdon lang ki dkhot ha ka 22 tarik u Nailur 2023 ki la leit syndon ban kynduh ïa u Deputy Commissioner ka Ri Bhoi na ka bynta ban ïa kren halor ka jingpynshlem ban pynbna ïa ka result thungkam jong ka DSC ha Ri Bhoi District.
Kane ka jingshim khia ka seng HYC Ri Bhoi District ba leit ïa kren sha u Deputy Commissioner ka Ri Bhoi bad uba dei ruh u Chairman ka DSC, u Arpit Upadhyaya, ka dei halor ka nongrim ba ka seng ka la ioh jingtip na kiba bun ki khun samla halor ka jingpynshlem ban pynbna ïa ka result thungkam jong ka DSC ha Ri Bhoi.
Lyngba Jong kane ka jingioh lad ban ïa kynduh ïa une u ophisar ba ha khliehduh ka Ri Bhoi, ka HYC Ri Bhoi halor katei ka phang ka la aiti ruh da ka jingthoh ban pynpaw ka jingsngewkhia halor ka jingshlem ban pynbna ïa ka result thungkam ka DSC ha Ri Bhoi.
Kumba la pynpaw da u General Secretary ka HYC Ri Bhoi, u Samla Shemphang Masharing, u la ong ba ka seng ka la shim khia ïa kane ka bynta, ka dei namar ba bun ki khun samla ki la lynga bad pisa halor ka jingpynslem ba pynbna ïa ka result thungkam ka DSC ha Ri Bhoi bad kum ka seng ka la pan jingshai ruh halor ka jingpynslem ban pynbna ïa ka result ba ki samla ki la dep ban thoh ïa ka examination thungkam naduh u snem 2021-2022.
Shuh shuh, u la ong ruh ha ka jingïakynduh ïa u Deputy Commissioner ka Ri Bhoi, u la ai ruh ïa ka jingpynshai sha ka seng ba ka jingslem ba pynbna ïa ka result thungkam ka dei namar ka jingdon ka jingthud halro ka roster system bad Job reservation Policy bad ka long pat kaba sngewkmen ba na ka liang u Deputy Commissioner u la kular ruh ban shim khia ban pynbna noh ïa ka result wat la ym lah ban ai ïa ka tarik ba pura ba kum ka seng ruh ka dawa ba dei ban pynsted noh ban pynbna ïa ka result khnang ba kan nym thud ïa ki samla ba wad kam hapoh ka District, u la bynrap.
