Ka long ka ba donkam ban sot na ki ktien shnong na kylleng ki thaiñ bad kyntoit shnong khnang ban pynriewspah ïa ka ktien Khasi bad ban kdup shitylli ïa baroh ki ktien ha kawei ka ktien pdeng. Nalor kita ki ktien ba la don lypa na ki kylleng ki kyntoit shnong ki don ruh ki ktien ba lah ban shna thymmai da ka ba synrop lang ar ne lai kyntien ban shna kawei ka ktien ka ba kit jingmut, ka ba thiang snah bad ka ba lyngkot katlah katïai khnang ban bit ban biang ka thoh ka tar. Kine harum la jer kum kat kum ba la pyrshang ban pynwandur ha ka ba dang dei ban tuklar da ka iktiar ba pura halor ka ktien:
Penance: ka mut nguhlet- nguh ka dei ba pyndem blei; let ka dei ka ba leh bym dei ha ka imlang sahlang ka longbriew manbriew. Kumta nguhlet ka dei ba duwai phirat ban ainguh bad panmab na U Blei na ka bynta ka lait ka let.
Percent: ka mut na-ka-shispah – na-ka-shispah ka dei ka jingkheiñ ne jingthew bynta na ka shitylli ba shispah.
Perfect: ka mut paka- paka ka dei ba biang thik nadong shadong.
Perspective: ka mut thewjngai- thew ka dei ba tynjuh jingkheiñ; jngai ka dei ba don sha pajih na ka bor ïohi ne bor sngew ha lade.
Philosophy: ka mut salon saiñnia saiñpyrkhat- salon dei ka ba ïathuh khanatang ki ba don ka khubor ba jylliew jingmut ki ba long artat ka nuksa bad jingsneng ha ka longbriew manbriew ka imlang sahlang lyngba ki ryta; saiñ ka dei ba phrang pynjanai; nia ka dei ka kyntien shongsbai ba khia jingmut; pyrkhat ka dei ka jingmut ha jabieng briew ka ba shemphang.
Phrase: ka mut ‘tienkaplang- ‘tien ka dei ka bynta ba shim lyngkot na ka ktien; kap ka dei ba synrap ar ne lai bynta hajuh; lang ka dei ryngkat kawei na ki ba bun.
Piece: ka mut lyngkhot- lyngkhot ka dei shibynta ba dkhat na ka met ba shitylli.
Plan: ka mut pyrshot, saiñkam- pyrshot ka dei ba pyrkhat lypa na ka bynta ka kam ka ba dei ban leh hadien; saiñ ka dei ba phrang pynjanai; kam ka dei ka jingtrei ban pynlong kumba thmu ban sule ha lade shimet, ha ka imlang sahlang bad ka longbriew manbriew.
Policy: ka mut kpait-saiñ-kam- kpait ka dei ka lynter ba pruid dak; saiñ ka dei ban phrang pynjanai; treikam ka dei ba leh kumno kumno na ka bynta ban sule kumba thmu. Kumta policy ka dei ba pruid dak bad phrang janai na ka bynta ban leh kano kano ka ban sule kumba thmu.
Politics: ka mut saiñpyrthei, saiñhima- saiñ ka dei ban phrang pynjanai; pyrthei ka dei ka jaka shityllup ka meiramew; hima ka dei ka bri synrop lang ïa ki raij jong ki kur ba pynlong ïa ka synshar hapoh u pud u sam ba la pruid dak ha kawei ka bri.
Pressure: ka mut bankhïa- ban ka dei ba tynrong nalor ha kaei kaei; khia ka dei ka jingthew ka ba jubor ban tynjuh kit ne rah. Kumta bankhia ka dei ka ‘tienkaplang ka ba thew ba la tynrong jubor kaei kaei ha ka ba ym lah shah shuh ban kyrshan.
Pressure group: ka mut kynhun bankhia- kynhun ka dei ka jinglum lang katto katne ngut ki briew. bankhia ka dei ba tynrong jubor kaei kaei ha ka ba ym lah shah shuh ban kyrshan.
Presentation/ Gift: ka mut bujai, aisngewbha- bujai ka dei ba wanlam eiei ki paidbah kum ban pynpaw sngewnguh ïa ki kynja longsan mansan; ai ka dei ba sam lem sha kiwei; sngewbha ka dei ba noh ka monlade da ka ba hun mynsiem.
Privilege: ka mut kabuhok- kabu ka dei ka lad ban ïoh myntoi; hok ka dei ka bhah ba la mang ban long trai.
Prophecy: ka mut kren kunok- kren ka dei ba mih ktien na shyntur ba sawa sur ba sngewthuh parabriew; kunok ka dei ka jingjia ba urlong kumba lah ïathuh lypa ha shwa.
Promiscuous: ka mut threw- threw ka dei ba kwah rhah khlem pud ban pynbyrngia da ki kam awria.
Pulse: ka mut kyndeh thied- kyndeh ka dei ba tied mar mar bunsien khlem sangeh; thied dei ki tyndong par snam ha ka met ki jingthaw ba im kum ki briew ki mrad ki sim ki doh.
Qualification: ka mut kyrdantbit- kyrdan ka dei ka snap longkhraw; tbit ka dei ba nang ba tip bad shemphang ha kano kano ka kam.
Quarrel: ka mut kynad, ïamai, ïania- kynad ka dei ba pun sniew ha la mynsiem pyrshah ïa kiwei; ïamai ka dei ba tim ba tla mar kylliang jong ki arliang mamla, ïania ka dei ba kynnoh kynta da ki ktien bym sngewthuh jingmut hapdeng arliang mamla.
Quest: ka mut thwet- thwet ka dei ba wad tyngeh lyngba ki raieh raidam.
Question Hour: ka mut por pyrthew, portohkit- por dei kano kano ka khep ha ka sngi; pyrthew dei ba kylli bad tohkit ka dei ba kham kylli bniah.
Queue: ka mut ang- ang ka dei ba ïeng ryntih marbud shibun tylli ne ngut ter-ly-ter.
Realise: ka mut tipthuh- tipthuh ka dei ba sngew ha lade ïa kaei ka ba jia kumba ka dei ban long.
Record: ka mut nathi- nathi ka dei ka bui thoh buh kynmaw.
Receptive: ka mut pliemon pliediang- pliemon pliediang ka dei ba khyllie pynpaw bad kamon kadiang ban ïoh pdiang paidbah lang.
Recess: ka mut khangshikylla- khang dei ba sangeh noh; shikylla dei ka por ba la mang ban ïakren ne leh kano kano ka kam.
Refine: ka mut phrang, pliah- phrang dei ba saiñ ha ka kynja shlem; pliah ka dei ba sani bad janai ka rukom trei.
Registration: ka mut buikyrteng- bui ka dei ka song buh jingtip shaphang kano kano ka bynta jong ki briew ha ka imlang sahlang; kyrteng ka dei ka nam ba la jer ban pynkup rngiew shimet ïa ki briew.
