Shillong, Naiwieng 7 : U Symbud Myntri Rangbah ka jylla u bah Prestone Tynsong u la pynpaw ba um pat nang ban ong haduh katno ka sorkar jylla kan lah ban pynkohnguh bad pynbor ïa ka sorkar pdeng ban phai dien biang halor ka Instrument of Accession (IOA).
“ Ngam tip shuh haduh katno ngin (sorkar jylla) lah ban pynkohnguh ïa ka sorkar pdeng halor kane ka mat. Nga tharai kane ruh ka dei ka subjek kaba ngin dang hap ban ïatai sani bha” ong u bah Prestone.
U la ong ïa kane halor ka jingdawa jongka seng KSU ba ka sorkar pdeng ka dei ban burom ïa ka IOA ba la ïasoi bad ki 25 tylli ki hima khasi ha ka 17 tarik Nailar 1948.
Nalor kata ula ong kat haduh mynta ka sorkar kam pat ïoh pdiang da ka jingthoh halor kane ka jingdawa.
Haba u pynpaw ïa ka jingsngew jongu shimet, u la ong “ Lada ïakren ïa ka hitori, ha ka por ba thaw ïa ka Riti Synshar ka ri India uwei na ki nongïalam ba radbah na ka jylla u Rev JJM Nichols Roy u dei u dkhot jongka Drafing Committee bad dei ruh ma u uba la wanrah ïaki District Council ha ka jaka jongka IOA”.
Ha ka 21 tarik Risaw ka KSU ka la shim 7 tylli ki rai hadien ka jingïathir ïamir jingmut halor ka Standstill Agreement bad ka Instrument of Accession, Annexed Agreement bad ka Sixth Schedule bad kiei ki lad ki lynti ban pynneh pynsah ïa ka kolshor ka jinglong tynrai bad ban kyiar na ki aiñ ki polisi ka sorkar pdeng. La shim rai ban ai da ka jkingthoh sha ka sorkar pdeng halor kitei ki mat khamtam halor ka IOA, Standstill Agreement bad ka Annexed Agreement.
U President ka KSU u samla Lambokstarwell Marngar ha katei ka jingïathir ïamir jingmut u la ong “ Nalor ka Sixth Schedule ka sorkar pdeng ka dei ban pynkup bor ruh ïa ka bnri u Hynniewtrep da kaba pyntreikam ïa ka Article 371 (A) & (G) kumba laleh ha kiwei ki jylla Nagaland bad Mizoram”.
