Shillong, Naiwieng 7 : Wat la hap ban ïaid hapdeng bun ki jingeh bad jingïaleh, hynrei ka thong ba hakhmat duh jongka sorkar ka long ïa ka pule puthi kumno ban pynphyrnai ïa ka jylla lyngba ki khynnah skul bad ki samla pule.
“ Lada ngi lah ban thaw da ki polisi kiba biang bad ïoh ruh ban treihok ïa ka kam khlem kano kano ka jingpynthut khlem pep ngin poi beit sha ka thong, hooid ka lah ban kham shim por hynrei ngin sa lah ban pynphyrnai ïa ka jylla bad kan long ka nuksa ïakiwei ruh da kaba ïoh ban pynrung ïa ka jingnang jingstad naduh ki khynnah skul haduh ki samla pule ha ka rukom kaba dei” ong u Mytnri Rangbah u Conrad K Sangma haba kren kum u kongsan ha ka jingrakhe jong ka St Thomas Higher Seconadary School Mairang ïa ka jubili ksiar jongka mynta ka sngi.
U la ong ka jylla Meghalaya ka la rung sha ka lynti ba kan long kawei na ki jylla ba kiew tam ha ka ri bad halor kane ka la buh thong ba ka pule puthi kan long kaba hakhmat tam. U la ong ba ki don bun ki jingeh bad jingïaleh ha kane ka bynta tangba da ka jingïai pyrshang bad trei shitom kiei kiei baroh kin sa kylla sha ka lawei ba phyrnai.
“Ka pule puthi kam dei ka kam kaba suk ban trei. Ki jingeh kiba ïa kynduh ki long kiba bun. Kan shim por ban wanrah ki jingpynkylla hynrei ngin ïai pyrshang bad ngin ïai bteng ban phai khmat sha kane ka bynta da kaba buh thong ban kyntiew naduh sor shaduh ki thaiñ nongkyndong. Ka long ka kam kaba eh hynrei ngin ym kynran dien ngin ïai ïabeh beit sha ka thong” ong u Myntri Rangbah.
U la ïathuh ha u 2018 ka kyrdan jongka jylla haka liang baroh ka dei shatrai duh hynrei mynta ka la nang kiew naduh ka roi ka par, ka ïoh ka kot bad ha kiba bun ki bynta, la ïoh ruh ka jingithuh ym tang na ka ri hynrei wat na kiwei ki ri ka pyrthei ruh.
“Ka jylla ka long shatrai duh ha ka liang ka jingai injek ha u snem 2018 hynrei hapoh ki sawsnem na ka kyrdan ba 27 ka la wan sha ka kyrdan kaba 2. Ngi trei ban wanrah ki jingkylla ha ki bynta baroh bad dei na kane ka daw ka la kiew mynta la ka dei ha ki kam jngohkai pyrthei, ki kam seng kam seng jam ne wat ha ka koit ka khiah ruh” ong u Conrad.
Ha kane ka jingleit sha Mairang u la plie ruh ïa u maw nongrim naka bynta ban tei ïaka Gallery jongka madan ïalehkai phutbol ka St Thomas. U la plie ruh ïaka Computer Labnoratory ka Mairang Presbyterian Science College kaba la mang pisa na ka Chief Minister Special Development Fund ha ka jinglut ba 6.77 lak tyngka.
ïa kane ka pisa ba la mang na ka bynta ka college la pynlut hok ban pynbiang ïa ki jingdonkam jong ki samla pule ïa ki kor computer namar kane kan long sa kawei ka subjek ka ban kyntiew ïa ki khynnah skul, ong biang u myntri rangbah.
U la leit ruh ban ïadon lang haka jingpynkut ïa ka College Week ka Khadsawphra College ha Mairang. Kane ruh ka long kawei na ki college kaba la kiew bha ha katei ka thaiñ kaba la ai ka jingshakri ba biang bha ïaki samla ka thaiñ. U la plie ruh ïa ki kamra klass ba thymmai ba la pynheh shuh shuh jongka college bad kumjuh ruh ïaki bus jongka college. Ula pynbna ruh ban ai 20 lak tyngka na ka CMSDF ban pyndep ka jingtei ïa kitei ki kamra klass ba la nang pynheh shuh shuh.
