Ki dak ki shin na ka kñia ka khriam ki long kiba bha na bynta ki khun ki hajar ka Hima : Syiem Khyrim

Shillong, Naiwieng 07: Ka shad niam Nongkrem ne ka shad Pomblang jong ka Hima Khyrim ha ka sngi Nyngkong ka la kut noh hapdeng ka jingphuh jingphieng ryngkat ka jingwan shim bynta ki khun ki hajar ka hima bad kumjuh ki nongwan shim bynta na kiwei pat ki hima jong ka Bri u Hynñiewtrep kaba la long ha madan shad ha phyllaw jong ka Ïingsad ha Smit.
Haba ïakren bad u Syiem ka Hima Khyrim u Pa’iem Dr Balajied Syiem u la ong ba kane ka Pomblang bad ka shad niam mynta u snem ka long kaba kyrpang namar hadien ar snem ba ki khun ki hajar kim lah ban wan shim bynta paidbha shuh kin lah ban wan shim bynta ban wan sakhi lang ïa kane ka lehniam bad ka shad ka kmen ka hima.
U la ïathuh ruh ba ka lehniam ka hima ka long kaba don jingkyrmen ïa ka bha ka miat ka hima kat kum ki dak ki shin ba ki pynpaw ha ka kñia ka khriam.
“Ki dak ki shin ha ka kñia ka khriam naduh kaba sdang ki long kiba bha bad kiba don jingkyrmen ïa ka hima bad ki khun ki hajar baroh ba u Kynrad un thehsei shibun eh ki jingkyrkhu”, u la ong.
U la ïathuh ruh ba ha kane ka shad ki poi ki nongshad kiba wan shim bynta kim duna ïa ka 300 ngut na kylleng ka hima bad na bar hima ruh.
Haba kylli halor ki jingpoi ki blang kiba ki raid bad ki shnat raid ki pynpoi sha kane ka niam u Pa’iem Balajied u la ong, “Ki raid bad ki snat raid kiba wan bujai blang kim duna ïa ka 40 tylli”.
Haba ïakren bad uwei napdeng ki Basan jong ka Hima u Dr Firmly Lyngdoh uba dei u Basan Raid Mawlieh u la ong ba kane ka niam jong ka hima ka long ban ainguh ïa u Blei Trai Kynrad bad ban kyrpad kyrpon ïa ka jingkyrkhu jong u ïa ki khun ki hajar ka Hima bad jong ka ri hi baroh.
Haba kylli halor ki blang kiba na ki shnat raid kiba hap hapoh ka raid Mawlieh ki bujai blang u Dr Firmly u la ïathuh ba kumba long mynta ki shnat raid kiba dang bujai blang bad u Syiem ki don kumba 12 tylli bad na kata ka daw la ju khot tuh kum ka 12 blang u la ïathuh.
“Ki raid kiba hapoh ka jingpeit jingkhmih jong nga kiba dang bujai blang bad u syiem ki long 12 blang kata na ka Raid Mawlieh, Raid Wahkhen, Raid Nongkhlieng, Raid Nongblai, Raid Mawja, Raid Mukertila, Raid Hynriewkur, Raid Nongshken, Raid Lting-Nongsohphan, Raid Nashaiñ, Raid Shatwait, Raid Pyrjan,” u la bynrap.
U la ïathuh ruh ba kane ka niam jong ka Hima kam dei tang na bynta u Syiem hynrei na bynta ka hima bad ki khun ki hajar baroh ba kin bit ki biang ka shait ka khlaiñ, ka kamai kajih jong ki, ka rep ka riang, kin roi parum pareh da ka jingkyrkhu u Blei Nongbuh Nongthaw.
Haba kylli mano pat ban lah ban wan bujai blang, u Dr Firmly u la ïathuh ba tang ki raid bad ki shnong ba la leh naduh mynshuwa kiba lah ban wan bujai blang hynrei ki khun ki hajar jong ki shnat raid baroh ki lah ban snoh kti lang bad kata ka raid jong ki ha kane ka lehniam da kaba ki noh lang ïa u synñiang u bynhei na bynta ban thied blang ban ai sha u Syiem u Kmie.
“Ki khun ki hajar ki lah ban ngeit ha kawei pat ka jingngeit niam hynrei ki dang dei ki khun ki hajar ka hima bad ka sad ka sunon ruh ka dei kajuh, namarkata ki lah ban ai lang ïa u synñiang u bynhei sha ki raid ne ki shnong jong ki ban thied blang na bynta ban bujai blang bad u Syiem ha Tyngkong Ïingsad.
Ha kane ka sngi na ka liang u Myntri Rangbah ka jylla u Conrad K Sangma u la wan sakhi lang ïa kane ka shad niam ha ryngkat ka jingaiti ïa ka cheque kaba 2 klur tyngka na bynta ban pynbha ïa ka Madan Shad ha u Lum Pomblang na bynta ban pynbha ïa ka jaka shad bad ka jaka shong ki Lyngdoh ki Basan, ki sordar, ki nongshad, bad ki paidbah nongpeitkai ruh.
Haba kren ha kane ka sngi na ka liang u Myntri Rangbah u la ai ka jingïaroh ïa ka jinglah ka Hima Khyrim ban bat ban ksoh la ka niam bad ki riti bad kyntu ruh ba horkit hordang kim dei ban klet noh ïa kane.
Ha kane ka sngi la sakhi ba kiba bun ki heh ki haiñ ki kynrem ki lyndan ki la wan ban shim bynta lang ha kane ka shad ba kynthup ïa u Chief Justice ka Meghalaya High Court u Justice Sanjib Banerjee, u Lamphang ka Ïing Dorbar thaw aiñ ka jylla u Bah Metbah Lyngdoh, ki myntri sorkar ba kynthup ïa u Bah Sanbor Shullai, u Bah Renikton Lyngdoh Tongkhar, u Bah Dasakhiatbha Lamare, u CEM jong ka KHADC u Bah Titosstarwell Chyne bad kiwei kiwei.