Dr Mukul: Ka IBDLP ka tyllong ban bsa ja ïa ki nong Meghalaya la pyndonkam bakla ka MDA

Tura, Naiwieng 7 : U Nongïalam ka Liang Pyrshah u Dr Mukul Sangma u la dap ka mynsiem haba u kren halor ka prokram treikam kaba u la seng nongrim haka jylla kaba long kum ka pliang ja ïa ki long iing longsem ba duk kata ka Integrated Basin Development Livelihood Programme (IDBLP) hynrei ula kynnoh ba kane ka sorkar MDA pat mynta ka la pyndonkam bakla ïa kane ka prokram.
“ Nga sngewthuh ïa ka jingdonkam jongkane ka prokram IDBLP. Namar nga dei u khun jong u nonghikai, kumta nga hap ban ïaksaid ha la ka jingim namar tang na ka tulop u kpa hap ban ïa im ja baroh shi ïing. Nga tip haduh katno ka eh bad nga dei uba wan na ka ïing ba duk” ong u Dr Mukul.
ïa kane ula kren mynta ka sngi ha ka jingplie ïa ka ophis ka AITC ha Tikrikilla, West Garo Hills.
U la ther tyngeh ïa kane ka sorkar MDA halor ka jingpyndonkam bakla ïa ka pisa u paidbah. U la ïathuh “ Nga la pyrshang ban wanrah lai tylli ki tyllong bei tyngka ki ban kyrshan ïa kane ka IDBLP na ka bynta ki paidbah. Ka sorkar pdeng kam lah satia ban ïarap kumta nga la wad jingïarap na ki tnad bei tyngka shabar ri kum ka Asian Development Bank, ka World Bank bad ka JICA.
U la ïathuh shuh shuh ba u la seng haduh 117 tylli ki tnad pule ha ka jylla lyngba ka Human Capital Development Fund ba la ai da ka Asian Development Bank. Hynrei kane ka sorkar MDA kam shym la lah ban ai ïa ki Utilisation Certificate sha ka ADB kumta la shu duh ei ïaka fund.
U la ong “ Kynmaw tang kawei ngi lah ban don ha kino kino ki seng saiñ pyrthei hynrei ngi dei baroh ki nong Meghalaya. Ka TMC ha ka jylla ka buh hakhmat ïa ka jaidbynriew. Namar da kaba pynkhlaiñ ïa ka party ka long kumba pynkhlaiñ ïa ka ri, bad ka lawei jong ki paid nongshong shnong ka dei ka niam jong ngi”.
Kiba la ïadon lang haka jingialang ki long ka Dikkanchi D Shira MLA ka Mahendraganj, MLA ka Chokpor u Lazarus M Sangma, u MDC ka Kharkutta u Cherak W Momin bad kiwei kiwei ki nongïalam.