Shah pynngat ki nongïalam HYC 5 tylli ki kyndon aiñ ba tur sha Secretariat ha u 2021

Ngim salia ban shah pynngat kyndon aiñ, ka jaidbynriew ka dei ban im

0

Shillong, Naiwieng 07: Ki lai ngut ki nongïalam jong ka Hynñiewtrep Youth Council ha ka sngi Nyngkong ki la shah khot hajir ha ki pulit ka Sadar Police Station halor ka jingleit tur jong ki shah Secretariat ha u snem 2021.
Kine ki nongïalam ka HYC kiba la shah khot hajir ki kynthup ïa u Vice President u Bah Donboklang Kharlyngdoh, Assistance General secretary u Bah Issac Basaiawmoit bad u President ka Shillong City u Bah John Lyngdoh.
Haba kren sha ki lad pathai khubor hadien ba la mih na Sadar Police Station u Bah Donboklang Kharlyngdoh u la ïathuh ba na ka liang ki pulit ki la pynngat kyndon ïa ki haduh 5 tylli kyndon aiñ kata hapoh ka kyndon 353, 341, 506, 34 jong ka Indian Penal Code bad ka kyndon 6A ka Meghalaya Maintenance of Public Order Act namar ka jingleit tur jong ki sha Secretariat ban pynkynmaw ïa ka sorkar halor ka jingleh klet jong ka ïa ka ILP bad ka jingbym buddien jong ka wat hadien ba ka ïing dorbar ka la mynjur ïa ka Resolution dawa ILP ban phah sha ka sorkar pdeng.
“Ki pulit ki la ïathuh ïa ngi ba la khot hajir katkum ka ejahar ba ki la ujor ha u snem 2021 namar ngi tur sha Secretariat ha ka por ba ngi leit pynkynmaw ïa ka sorkar ïa ka mat jingdawa ILP bad na ka liang ki pulit ki la kylli shibun bah ki jingkylli hynrei tang kawei ka jubab ba nga ai ka long ba lada ngim leit ban pynsngew ïa ka sur jong ngi ha Secretariat shaei pat ngin leit pynsngew” u la ong.
U la ong ruh ba ka jingbym banse jong ki ban leit tur Secretariat ha u 2021 ka dei namar ka jinglehklet ka sorkar halor ka ILP wat hadien ba la dep ban mynjur da Resolution halor ka ILP namar kam don kao kano ka jingbud dien bad ka sorkar pdeng halor kane ka mat khnang ban pynïoh LP noh ha ka jylla.
Haba la kylli la ka HYC kan randien noh halor ka jingdawa ILP, u Bah Donboklang u la ong ba da leilei kin ym kynriah noh hynrei ki long kiba la kloi ban shah pyngnat ha kino kino ki kyndon aiñ, ban shah kem ne wat ban shah siat ha ki kuli ruh hynrei ka jaidbynriew ka dei ban im u la ong.
“Ha u snem 2019 ha ka por ba don ka jingleit tur sha ïing u Lat u kuli u lait salit na nga bad ngam randien bad mynta ka kynti ruh ngi baroh laingut ngin ym randien hynrei ngin leh kham tyngeh bad ka jingshah pynngat kyndon lei ka nang pynskhuiñ kumba ong u SJ Dunncan”, u la bynrap.
U la ong ruh ba na ka liang ka seng kan ym kynran dien noh ban dawa ïa ka ILP wat lada dei ban shah set phatok ne shah siat ïap ruh ki dkhot ka HYC ki long kiba la kloi na bynta ban ïakhun ïa ka jaidbynriew.
Shuh shuh na ka liang jong u u ola ong ba ki 60 ngut ki MLA ki la leh pop namar kim shym la budien ïa ka Resolution kaba ki la dep mynjur lang ha u 2019.
U la ong ruh ba kum ka seng kin nang kham leh tyngeh ban dawa ïa ka ILP khang ba kan ym kut tang ha ka resolution, “ngi kyrpad ïa ki para ri baroh ba kin snoh kti lang bad ngi bad lada kim lah ban wan shim bynta sha ki jingïakhih ruh nga kyrpad ba phin duwai na bynta kine ki 60 ngut ba kin kylla kaba mut ba lakumno kumno shuwa ban wan ka ilekshon 2023 ngin ïoh ILP”, u la ong.

Leave A Reply

Your email address will not be published.