Khliehriat K’lyngkot 30: Uwei u Samla uba kyrtengu Kefel Nonsiej, 18 snem ka rta uba na ka shnong Kynshi Mawria, Eastern West District, u la ngam jyllop ha kawei ka thwei kaba don hajan ka kshaid Umbyrleiñ, ha shnong Rangad, East Jaiñtia Hills District, kat haduh ba thoh ïa kane ka khubor, ïa ka met jong utei u Samla ym pat lah satia ban sei napoh um. Ki Pulit ngam um ki la pyrshang ban ngam ban wadïa ka met jong u, hynrei kim shym la lah ban da ka jingwan noh ka miet ki la hap ban snageh noh. Ki Pulit ki la ïathuh ba kin sa wad biang lashai ka sngi ynda wan ki Pulit ngam um ne ka State Rescue Team na Shillong.
Katkum ka jingiathuh jong u Waheh Shnong Rangad, u Bah Damon Lamo, la ong ba utei u rangbah uba ngam jyllop, u la wan lang da ka bos ryngkat lang bad kiwei pat ki paralok kiba na ki shnong bapher bapher bad ong ba ka bos ka dei kaba mih na shong Nongmynsong bad ki la ïa wan kai pyngngad sha katei ka kshaid Umbyrleiñ ha shnong Rangad ban wan bamkhana, hynrei sngewsih pat ba utei u rangbah u la ngam jyllop noh ha ka thwei ba don ka kshaid.
Ki bor shnong, ki la pyntip mar mar sha ki Pulit jong ka Ladrymbai Outpost ha kaba ki pulit ruh mar mar ki la shim khia bad pyntip sha ka State Rescue Team, Shillong ban ïarap ban sei ïa ka met jong une u Samla.
I Kmie jong u Kefel, i Kong A. Nongsiej, i la ïathuu ba u khun jong u u leit bylla sha Shillong bad i la ïoh jingtip na ki paralok jong u ba mynta ka sngi u la leit bam khana ba ki paralok ba ïaleit bylla lang bad u. Ynda poi ha katei ka jaka ba bam khana kaba don ka thwei, ki la ïasum, hynrei u Kefel u la poi sha ka kaba kham jylliew bad ym tip kaei kaba la jia um shym la lah suh ban mih shabar jong kane ka thwei.
