Tura, Kyllalyngkot 30 : Ka Meghalaya Pradesh Congress Committee (MPCC) ka la aipor 48 kynta ïa ki Meghalaya Pradesh Youth Congress (MPYC) na Ri-lum Garo ba kin ai jingpynshai halor ka jingïakhih bad jingthang ïa ki tyngshop ki Nongïalam ka Party ba kynthup ïa u ma Vincent H Pala bad ka Deborah Marak myn ha ka miet sngi Thohdieng.
Kane ka jingaipor kan kut lashibit mynmiet ka 30 tarik u Kyllalyngkot.
U Secretary ka MPCC u Sanjay Das ula ai ïa ka showcause na Shillong bad la phah ïa ka sha u Nongïalam ka Youth Congress Robert K Sangma, uba ïalam ïa ki dkhot ban ïakhun pyrshah ïa ka party ha kine ki arsngi bad dawa ïa ka party ban shong bishar biang ïa ka jingjied kyrtong ha ki katto katne ki constituency ka Ri-lum Garo.
Ka Youth Congress ka la pynlong ïa ka dharna ha ka Republic Day shabar ka Congress Bhavan ha Tura bad hadien ki la thang ïa ki dur tyngshop jong u ma Vincent, Deborah bad ruh jong u kyrtong na North Tura Billykid A Sangma bad u kyrtong na Gambegre Saleng A Sangma.
Watla ka Youth Congress kala rai ban jubab ïa kane ka jingpan jingpynshai kat kum ka nongrim ba ki don, hynrei kala mih ruh ka jingiakren bad bun ki dkhot kin sa ïehnohkam halor kane ka kam.
“Ha ka jaka ba kin sngap ïa kaei kaba ngi don ban ong bad ban pyrkhat bha balei ba ngi mih ban pyrshah bad ban pynshai halor ka rai ban jied ïa ki kyrtong ki bym dei na ka Congress, ka High Command kala leh bym patiaw ïa nga bad ai pynban da ka showcause” ong ki Nongïalam ka Youth Congress.
“Ngi kwah ïa ka jubab balei ba ki briew naka liang pyrshah bad kiba ju ïeng pyrshah ïa ka Congress bad kiba la wan rung tang ban ïoh ticket hadien ba ki shah kyntait nala ki jong ki party, la shu pdiang ïa ki ha ka jaka jong ki Nongtrei ka Party kiba la pynkhreh ban mih ïakhun ïa ka elekshon mynta la shisnem arsnem” buh jingkylli u Robert K Sangma.
Ula ong ba kine ki kyrtong kiba dang shu wan rung dkhot sha ka Congress dang mynnin bad ki bym ïapher kum ki briew nabar, kiba la shim kabu ïa ka party bad kila ïoh long ki kyrtong ha ka jaka ki nongtrei ka party kiba la trei shitom. U ong ba ïa kane la sakhi na ki constituency ka Salmanpara, Gambegre bad Kharkutta.
Ha Salmanpara, u Nongtrei ka Congress bala slem bha u Damrik K Sangma ula shah bujli shimiet shimiet da u Sinbath Marak watla u Damrik ula pynkhreh la palat arsnem ban mih aireng ha ka elekshon.
Ha Khatkutta, u MLA barim Omillo K Sangma bad kawei ka Longkmie kila shah leh lyndet da u briew ba dang shu wan rung thymma u Chireng Peter R Marak.