Ka MDA ka kop bha ïa ka JJM, hynrei bun ki Shnong kim pat ïoh um

Shillong, K’lyngkot 30: Ka MLA jong ka Seng TMC ha Mahendraganj bad ka kurim jong u Dr. Mukul Sangma, ka Dikkanchi Shira, ka Dikkanchi Shira, ka la ther tyngeh ïa ka jingtreikam ka sorrkar MDA, kaba la ju kob ju sob bha ha kaba ïadei bad skhim Jal Jeevan Mission (JJM) ne ka skhim ban ai um sha baroh ki thliew ïing ha ka jylla.
Ka Shira, kaban ban ïakhun biang ïa kane ka elekshon 2023 na ka TMC, ka la ong ba ki paidbah nongshong shnong ka jylla ki tip bha ïa ka rukom treikam ka sorkar NDA, namar tang na ka skhim JJM la lap tyngkreiñ ïa ki kam thok kam shukor jong ka ha kaba kiba bun ki shnong haduh mynta kim pat ïoh um satia.
“Ki paidbah kiba don ha ki shnong ki thaw ki tip bha ïa kane, namar ki dang don bun ki shnong kiba ym pat ïoh um satia na ka JJM”, la ong ka Shira lyngba ka kyrwoh ba la phah da ka Video.
Ka MLA jong ka Mahendraganj, ka la ai nuksa na kawei ka Shnong kaba don ha Rongjeng, kaba don tang 37 tylli ki longïing, ha kaba mynshem snem ki la kular ban pynïoh um lyngba ka JJM, hynrei haduh mynta ki paidbah na kane ka Shnong kim shym la ïoh um satia.
Ka la ther ruh ïa u Myntri Rangbah, u Conrad Sangma, uba la leit jingleit ha kine ki sngi da kaba shong beit da ka Helicopter, katba ki paidbah ka jylla pat ki nang mad ïa ki jingeh ha ka jingim ba man la ka sngi jong ki da kaba hap ban ïai na ki surok kiba khohruh khohram.
Ka la ong ba na liang ka TMC ka kular ba baroh 6459 tylli ki Shnong ha ka jylla kin ïoh surok rong bad kumjuh ruh ki surok ba donkam ha ka jylla yn pynkylla kum ki surok kiba la siang rong bha.
Ha kajuh ka por ka la ong ruh ba lada ka TMC ka wan ha ka bor, baroh ki jingkular elekshon jong ka yn pyntreikam noh hapoh shi spah sngi naduh ba ka shimti ïa ka jingsynshar.
Ka Dikkanchi ka la ong ruh ba ka sorkar MDA kadei ka sorkar kaba shu thok shu shukor ïa u paidbah ha kiba bun ki liang, namar kiba bun ki kam kiba ka trei kidei kiba la shu trei torti bad tang ban shu pynbieit paidbah.