Tura, Kyllalyngkot 30 : U National President ka NPP bad Myntri Rangbah ka Jylla Conrad K Sangma ula u la ong ba ki paidbah ki la sdang sngewthuh ïa ki Card ka TMC ba ki dei tang ki kular thok ha ka por election ban pynbieij ïa ki paidbah bad mynta ki la sdang ban thang ïa kine Card kata ka ‘We Card” bad “MYE Card”.
Haba ñiew ïa ki Card TMC kum ki “Baaki lane Credit Card” ha ka rally elekshon ha South Tura ban sdang ïa ka jingïalap elekshon hynne ka sngi nyngkong, u Conrad ula ong ba wat ki paidbah ha ka Constitunecy u Dr Mukul Sangma kata ka Songsak bad wat ka Williamnagar kila sdang ban thang ïa ka We Card bad MYE Card namar ka jingsngew ba kan nym don ka jingmyntoi ba kin ïoh na ki.
“Ha ka por elekshon, ki Party kin kular ïa shibun kiei kiei ïa ki Nongthep Vote…hynrei ngi na ka NPP ngim kwah ban thok da kine ki jingkular song pisa ban ai hadien ka elekshon. Ha ngi hi, ngi pynthikna ba ngin ai ïa ki paidbah ïa kaei kaba ngi kular shuwa ka elekshon hi “ ong u Conrad.
Ula kren ruh halor ki kam pynroi ha Sor Tura hadien bun bun phew snem bad ong ba ka Sor Tura, kaba la shah phai lyndet na ki kam pynroi la bun bun snem, kala ïohi ïaka jingkylla ha manla ki shnong ki thaw. “Ka thong jong ngi ka long ban pynlong ïa ka Tura kum kawei na ka nuksa jong ki sor ba biang eh hapoh ka thaiñ Shatei Lam Mingi” ula ong.
U Conrad ula pyntip ruh “Shen ka Jylla kan sa ïoh ïa ka Art Convention Centre bad ka Auditorium. Ngin sa ïoh ïa ka Administrative Complex, ka ban long ka mini secretariat ha Tura. Kan sa mih ruh ka Skill Development Centre bad ka Youth Councelling Centre kaba dep ban mang pisa mynta”.
“Ka nuksa hi ka dei ka jingïaid ka kam jong ka PA Sangma Sports Complex kaba la pyndep ïa ka stadium phutbol bad ka ban sa kynthup ïa ka Integrated Indoor Sports Complex ka ban don ïa ka Swimming Pool, Badminton, Basketball bad kiwei kiwei ki jingialehkai” ula bynrap.
