Shillong, K’lyngkot 30: U President jong ka Meghalaya Pradesh Trinamool Yoouth Congress Committee u Fernandez S Dkhar ha ka sngi Nyngkong u la takraiñ ïa ka NPP halor ka jingkynnoh ba ka TMC ka dei ka party bar jylla bad kumjuh halor ka jingkynnoh ka BJP ba ka party ka dei kaba ieid thep mynsiem ïa ki khar Bangladesh bad ong ba kane ka jingkynnoh ka dei namar ki la tieng la syier palat ïa ka TMC ba ki la ïohi ba ki paidbah ki la ai jingkyrshan pura sha kane ka party.
U la ong ba ka jingkynnoh ba ka TMC ka dei ka party kaba kyrshan ïa ki khar Bangladesh ka dei tang ka buit ïalam bakla ïa u paidbah ka jylla.
“Hato mynno phi ïohi ba ngi kyrshan ïa ki khar Bangladesh ngi (TMC) kyrshan mo ïa ka Citizenship Amendment Bill (CAB) hato ym dei ka NPP kaba la vote ruh ban pynlong aiñ ïa kane ka aiñ ban ai jingithuh ba ki khar Bangladesh kin long nongshong shnong pura ha ka ri. Nga sngew lyngngoh ban ïohi ba ki ong ngi kyrshan ïa ki khar Bangladesh ha ka jingshisha dei ka NPP phi kaba mynjur bad ka BJP ban wanrah ïa ki khar rit paid ba shah ban beiñ na Bangladesh ban long nong shnong shnong ha ka jylla bad ka ri,” u la ong.
Haba kren halor ka jingkynthoh ka NPP ba ka jingkular ban ïarap sha ki kynthei bad ki samla ka dei tang ka buit phon ka TMC bad ba lada pyntreikam ïa kane ka skhim ba la kular ka TMC yn hap die duh ïa ka jylla, “Kito ki ba ong ba ngin die duh ka dei tang ka jingkynnoh sngew kut lad jong phi namar ngi ka TMC ngin ym leit lilam phi ïa ka jylla kumba la leh ka NPP ïa ki jaka khappud da kaba ka die sha ka jylla Assam”, u la ong.
Haba kynthah ïa ka BJP bad ka jingpheil jong ka ban pynurlong ïa ka jingkular u la ong, “Hato ym dei seh ba u Modi u ular ban pynih 2 klur ki kam thymmai ban ïoh kam ki samla hynrei la jan poi 10 snem ba u synshar hato u Modi bad ka BJP ki la pynurlong ïa kane. Ngi kumba ngi kular ban pyntreikam ïa ka WE card tang ar taiew hadien ba ngi thaw sorkar bad ngin pyndep ruh”.
U la ong ruh ba ka sorkar MDA kam shym la leh eiei na bynta ka jylla bad ka pule puthi wat hadien ba ki paidbah ki la ai lad ba kan synshar “namarkata, wat pan jingkyrshan shuh na u paidbah namar 5 snem phim ïa leh eiei” u la ong.
Shuh shuh u la ong ba ka jingpynrung kyrteng kumba 3.60 lak ban ïoh jingmyntoi lyngba ka WE Card bad jan kot3 lak ha ka MYE Card ka party ka kyrmen ruh ba ki paidbha ka jylla kin shaniah ban ailad ïa ka party ban ïalam ïa ka jylla.
