Kynnoh ba phriang ka ‘message’ ba kwah pynrem u heh NPP ïa u Martin Dangngo

Shillong, K’Lyngkot 30 : Da ki spah ngut ki nongïalam ka NPP na Ranikor constituency ki la resaiñ noh na ka party ha kane ka sngi Nyngkong bad ha kajuh ka sngi ki la leit ban pynïasoh noh sha ka party BJP.
Ym tang katta, shwa kane kitei ki nongïalam ka NPP ki la kynduh shwa para ma ki ha kaba ki la shim ruh ïa ka rai ban pynbor ïa u kyrtong ka NPP na katei ka constituency Bah MM Dangngo ba un hap ban resaiñ noh khlem buhteng shuh na ka NPP.
Haba pynshai halor ka daw kaba pynlong ïa ki ban shim syndon da ka sienjam kaba tyngeh, ka Kong, Pelcy Snaitang, nongïalam ka NPP na katei ka thaiñ ka la ïathuh ba kaba pyndom eh ïa ki nongïalam ka NPP kadei halor ka jingphriang ki ‘message’ kaba la kynnoh ba wei na ki nongïalam ba hakhmat ka NPP ha ka jylla u la pynpaw ba um kwah satia ba u kyrtong ka party un jop hynrei ban pynjop biang ïa uba rim.
“Dang nyngkong ngim da tieng eh ïa katei ka ‘message’ kaba phriang namar ngi la trei shitom ban pynjop donburom ïa u Bah Dangngo na ka Party. Hynrei ha ki shibnai mynta haba ngi mut ban sdang noh ïa ka kam ban pynkhreh ïa ka elekshon, ngi la pyrshang ban kynduh ïa u Myntri Rangbah ban pynsngew ïa shibun ki jingeh ba ngi kynduh kumba u la kular. Tangba ki nongïalam ka NPP ha ka jylla kim ailad ban kynduh ïa u Myntri Rangbah,” ka la ong.
Ka la ïathuh ruh ba dei ha kine ki ar taïew ba ki la sdang ban peiphang haba ïadei bad katei ka message haduh ba ki la sheptieng ba ïoh kadei ka jingthmu ban pynrem ïa u kyrtong jong ki.
“Ngi sheptieng kadei namar ngim ïoh lad shuh ban kynduh ïa u nongïalam ba rangbah jongngi ban pynpaw ïa ka jingeh kaba ngi kynduh haba ïadei bad jingpynkhreh u kyrtong jongngi,” ka la ong.
Shuh shuh ka ong ruh ba ki la pyrshang bunsien ryngkat bad u Bah MM Dangngo ban kynduh ïa u Myntri Rangbah hynrei la ong ïa ki ba kin ym lah shuh ban kynduh bad lada donkam, ki hap ban ap haduh ban da kut ka elekshon.
Shwa kane, haba ïa kren bad u Bah MM Dangngo ba dei u kyrtong ka NPP na Ranikor, u la ong ba ka jingrung jong u sha ka NPP kadei da ka jingpynbor u paidbah nongïalam bad kumta mynta ruh kaei ka rai kaba ki shim u hap ban pdiang ïa kata.
“Tang haduh mynta nga dang dei u NPP bad lehse hadien ba nga la ïoh ban ïakren bad phylliew jingmut bad ki nongïalam ngan sa shim ïa ka rai,” u la ong.
Ha kane ka sngi, na ka liang ka BJP ruh hapoh ka jingïalam jong u State Vice President, Dipayan Chakraborty ki la pdiang burom ïa kumba 700 ngut ki nongïalam ka NPP na Ranikor constituency.