Ka TMC kam ju bei tyngka ne kino kino ki Party ruh hynrei ngi sei na pla lajong : HITO

Ïaid paidbah ka HITO ban pynshai halor ka jingjied Nongmihkhmat

0

Shillong, K’lyngkot 30: U President jong ka Hynñiewtrep Integrated Teritorial Organization (HITO) u Bah Donbok Dkhar ha ka sngi Nyngkong u la kyntait war ïa ka jingdon ki seng saiñ pyrthei khamtam eh ka TMC kumba la mih ki jingkynnoh ba ka bei tyngka ïa ka na bynta ban pynlong ïa kino kino ki jingïakhih pyrshah ïa ki rukom treikam ka sorkar MDA.
Haba kren ha ka jingïalang pynshai paidbah haba ïadei bad ka jingjied nongmihkhmat kaba pynlong ha Motphran u Bah Donbok u la ong ba kumba la seng ïa ka HITO ban ïeng ïada ïa ka khynde ka shyiap, ka hok longtrai ki trai muluk kan ym lehraiñ ban kren ïa ki jingshisha haba ïadei bad kane wat la yn don kiba mong ruh.
“Ki don kiba la isih ïa ka HITO namar ki kam bad kiba ngi kren ki dei ki jingshisha kiba pynmong ïa ki hynrei nga kwah ban ong ba wat isih ïa ka HITO hynrei isih ïa ka jingshisha namar ka dung ïa phi,” u la ong.
Haba kren halor ka mat jong ka jingpynlong ka HITO ïa kane ka jingïaid paidbah da ki kali bad ki ar shaka kaba la sdang aduh na Lad Smit shaduh Motphran, “Ym dei ba ngi ong ïa phi kyrshan ïa kane ne katai ka party hynrei ban kyrsiew thiah ïa phi ba ynda phi vote sngewbha jied da u briew uba don ka jinglah ban thaw ki aiñ na bynta ban im ka jaidbynriew ym ban jied da uba ai pisa u bym don jabieng pat ban thaw aiñ,” u la ong.
“Kito kiba ong ba ïa ngi la bei tyngka da ka TMC ha khot ïa u Mukul ne kino kino ki nongïalam ka TMC ngin kren haba shai namar nga itieng ïa kane ka jingshah ïalam bakla ki paidbah ha ka social media,” u la ong
Haba kynthah ïa ka sorkar u la ong ba dei ka jingleh hi ka sorkar kaba dawa ïa ka HITO ban mih ban kynthah namar kiwei ki kam kiban ïada ïa ka jaidbynriew kumba ka la kular kam pyndep satia.
“Ka MDA ka la pyntyrha ïa ngi bad ngi ruh mynta ngin pyntyrha kylla ïa ka bad kane ka dei ka sorkar bamsap phin peit naduh ka bamsap ha u khaw ne ka bording ne kiwei pat ki tnat. Ïoh ba ngi klet ruh ba dei kane ka sorkar kaba la knieh ïa ka hok ban im uwei u para doh para snam jong ngi da kaba leit siat ïap ha kamra thiah jong u hapdeng ka jingban ka jingpang ïa u,” u la ong.
U la ong namarkata ki paidbah ki dei ban kynmaw ba ha ka jingjied nongmih khmat ha kane ka kynti ki dei ban kynmaw ïa ka jingshah siat bom pynsat khmat ki nongmih khmat, ka jingshah pynthiah surok ki nonghikai, ka jingthok halor ka ILP, ka jingdie duh ïa ka jaka khappud bad kiba bun ki mat u la jer.
Haba kren halor ka jingmih ka jingkynthoh halor ka jingleit kyrshan jong u ïa u Bah Ardent ha ka rally ba long ha Polo, “Ngam len bad ngam buhrieh halor kane ba nga leit keiñ ban kyrshan hynrei ngam shym la kyrshan matlah hynrei nga buh jingkylli ruh ïa u halor kiba bun ki mat kiba um lah ban pynurlong ha ki por ba u long MLA bad kane ka jingkyrshan ka dei namar u long u briew uba beit bad u ba nud ban kren ïa ki jingshisha,” u la ong.
Ha kane ki sngi la ïoh ruh ka jingkren na ki nongïalam bapher bapher kiba la khot la wer ïa ki paidbah ban jied nongmih khmat ym da ka jingsngew hynrei da ka jingstad namar ka la dei ka jingdawa ka jylla ban ïoh noh ïa ka synshar khadar bakhuid bad kiba la kdew ruh ïa ka jingtreikam ba jahulum jong ka sorkar bad ka jingbym don nongthaw aiñ kiba kynsai ban kren ïa ka mat ba ktah ïa ka jaidbynriew.

Leave A Reply

Your email address will not be published.