Shillong, K’lyngkot 30: U nongwad RTI ka jylla u bah Disparsing Rani ula kynnoh ba ka tnat ka koit ka khiah ka jylla Meghalaya kala pyndonkam bakla haduh T.43 klur ka pisa ba ïoh na ka sorkar pdeng ban pyndonkam naka bynta ban ïakhun pyrshah ïaka khlam COVID-19.
Haba kren sha ki lad pathai khubor u bah Disparsing ula ïathuh ba ka kaiphod lyngba ka RTI na ka tnat Ministry of Health & Family Welfare, la ïathuh ba ka sorkar pdeng haka wat ba nyngkong (Phase I) ka la pyllait T. 15.61 klur bad haka wat ba ar (Second Phase II) kala pyllait T.104.12 klur shaka Meghalaya.
U bah Disparsing ula pynkynmaw ruh ba ka jubab da u Myntri ka tnat ka koit ka khiah ka jylla u James Sangma ha ka ïing dorbar thawaiñ ula jubab ba ka sorkar pdeng ka la pyllait tang T.76 klur shaka Meghalaya.
“Ka jubab U James Sangma hapoh ka ïing dorbar thawaiñ, ka long ba thok namar ula pynpaw ba ka Meghalaya ka ïoh tang T.76 klur na ka sorkar pdeng katba ka jubab lyngba ka RTI naka tnat Ministry of Health & Family Welfare sorkar pdeng ka long T. 119 klur bad kane ka kdew shai ba ka tnat ka koit ka khiah sorkar jylla kala pyndonkam bakla ne pynjah rngai ïa T.43 klur” la kynnoh u bah Disparsing.
U bah Disparsing u la pynpaw ba kat kum ka jingwad bniah lyngba ka RTI na ka tnat ka koit ka khiah jong ka sorkar jylla ka paw shai ba ka don ka jingpyndonkam bakla ïa ka pisa kaba ka jylla ka la pynlut ha ki ar snem jong ka jingwan lyngshop ka ka khlam Covid-19.
