Shillong, K’Lyngkot 30 : U President ka UDP, Bah Metbah Lyngdoh hynne ka sngi Nyngkong u la ong ba ka jingkam jong ka NPP ba kin jop haduh 34 ngut na ki 57 ngut ki kyrtong ka pynpaw shai ba ka la dep ban pynrem lypa haduh 23 ngut ki kyrtong kiba ïakhun na katei ka party ha kane ka elekshon MLA kaban sa long shen ha u bnai ban wan.
Ïa kane u la kren halor ka jingkynthoh jong u nongïalam ka NPP, Bah Prestone Tynsong ha ka jingïalang kaba long ha Mawngap ba ka UDP kan jop tang kumba 6 ngut ei ei na rilum Khasi ha kane ka elekshon ban wan.
“Ka NPP ka la kam ba kin jop 14 ngut na rilum Garo bad kumba 20 ngut na rilum Khasi – Jaiñtia, kaba mut ba na ki 57 ngut ki kyrtong ba ka la dep pynbna, 23 ngut ki kyrtong ka la dep weng lypa na ka jingjop,” u la ong.
Kumta, u ong ba kane ka jingleh jong ka NPP ka la theh umpjah hi dalade ïalade ha shwa ka elekshon. Hynrei haba kren pat halor ka UDP, u Bah Metbah u la ong ba na ka party hi ki buh beit ka jingkyrmen ba baroh ki kyrtong kiba aireng kin poi sha ka thong.
Katkum ka jingong jong u, ka NPP ka la dep ban pynbna haduh 58 ngut ki kyrtong hynrei hadien ka jingresaiñ noh ki nongïalam ka NPP Ranikor ban leit ïasoh sha ka NPP nalor ba ki la pynbor ruh ïa u kyrtong ka party, Bah MM Dangngo ban resaiñ lang, ka jingdon ki kyrtong lehse ka lah ban hiar noh sha ka 57 ngut.
