Shillong, Naiwieng 12 : Ka Meghalaya ka la jop takma Ksiar ha ka sien ba nyngkong ha ka lympung ïalehkai 2nd North East Olympic Games lyngba u Willbornson Wahlang uba la jop kyrdan ba nyngkong ha ka MTB Downhill Hardtail kaba dei ka jingïakop Cycling kaba la pynïalehkai ha khlaw Forest hynne ka sngi Saitjaiñ.
Ka Meghalaya ha kane ka jait jingïalehkai ka la khur ruh sa kiwei pat ki takma, kata ïa ka takma Rupa bad takma Rupa ba la ïoh da u Amedius Therlang Marbaniang bad u Nicholas Syrti. Satang ar second ka jingïatam ha ka ban pyndep ïa ka thong ha kaba u Wahlang u pyndep ha ka por 2 minit bad 23 second, da kaba tam ïa u Amedius Therlang Marbaniang (2:24) bad u Nicholas Syrti (2:25).
Ka Manipur ka la khur sa kawei ka takma Ksiar lyngba u Thokchom Tennyson Singh (2:08) ha ka MTB Downhill Full Suspension da kaba wan kyrdan ba nyngkong bad tam ïa u Dame Wanki Ha-o Suiam (2:15) jong ka Meghalaya. Uwei pat u nongïalehkai ka Manipur u Kshetrimayum Jack Singh (2:19) u jop takma Rnong ha ka kyrdan ba lai.
Ha ka liang ki kynthei kiba ïashim bynta ha ka Open cross country race, ka Lindum Iakia jong ka Arunachal Pradesh ka la jop takma Ksiar da kaba pyndep ha ka por 9 minit, 42.00 second, ka Pangambam Priya Devi (9:43.44) ka jop takma Rupa bad ka Haomon Urbashi Devi (9:48.10) second ïa ka takma Rnong bad baroh kidei kiba mihkhmat ïa ka Manipur.
Ha ka jingïalehkai ha ka sngi Thohdieng, u AZ Thotmachan jong ka Manipur u la khur ïa ka takma Ksiar, u Pynshailang Khyllait jong ka Meghalaya u jop takma Rupa bad u Vanlalruata jong ka Mizoram ïa ka takma Rnong. Ha ka elite men’s cross country, ïa ka takam Ksiar la jop da u Khundrakpam Ronel Singh jong ka Manipur, u Kevin John Khyllait ïa ka takma Rupa bad u Mesak Vanlalvena jong ka Mizoram u ïoh ïa ka takma Rnong.
Ïa ka jingsam khusnam jong baroh ki kyrdan ïalehkai la sam hynne hi ka sngi Saitjaiñ, ha kaba ka Dr M Ampareen Lyngdoh, MLA ka la don lang kum ka Kongsan, ha ka jingïadonlang u Bah Cyril VD Diengdoh, IAS uba dei u Additional CEO jong ka NEOG 2022 bad Secretary jong ka sorkar Jylla.
Ka jingïalehkai ñiah cycle kan bteng biang ha ka sngi ba ar kata ha ka jingïakop ñiah ba 80km road race, kaban sdang na Nongbah Shillong haduh Mawthadraishan.
