Nalor ka jingrakhe pynkut ïa ka Jubili ksiar, la pynkyntang ïa ka ïingmane ba thymmai ka Parish Mawbri

Nongpoh, Kyllalyngkot 08 : Ka long shisha ka jingkmen na ka bynta ki paid riewniam ka Balang Katholik ba hap ha ka Parish Mawbri ha kaba mynta ka sngi U Blei nalor ba ka la lah ban pynkut noh ïa ka jingrakhe ïa ka jingdap 50 snem ka Parish bad la lah ruh ban kyrkhu ïa ka ïingmane na thymmai da u Lyngdoh sad ba rangbah ka jylla niambah Shillong, u Archbishop Victor Lyngdoh.
Kum ban pynpaw paidbah, ïa kane ka ïimgmane jong ka shnat Niam Mawbri la ai nam ha ka kyteng ka ‘Jingpynpaw U Blei’ lane ka ‘Epiphany’ kaba hap ha ka Zone – 7 jong ka Shillong Archdiocese, kaba u Lyngdoh sad ba rangbah ka jylla niam bah Shillong, u Archbishop Victor Lyngdoh u la shim ïa ka bynta ban ai ka jingkyrkhu ryngkat ka duwai ka phirat ïa kane ka ïingmane ba thymmai ba kane ka Parish ka la pynhap pyrda ruh ïa ka jingrakhe dap 50 snem ka jingïaid lynti naduh ba la seng ïa ka Parish Mawbri ha u snem 1972.
U Archbishop Victor Lyngdoh kum u kongsan ban ai ka jingkurkhu ïa kane ka ïingmane ba thymmai u la ai ruh ka jingtyrwa ïa ka nguh ka dem Blei bad ban kyrkhu ïa ka Iingsad Iingsunon kaba thymmai jong ka Shnat Niam Mawbri kaba u la ai ka duwai ka phirat ïa ka Umkhuid Umsuba ban synreit ïa ki sawdong sawkun Ki kynroh ka ïingmane.
Ka long ruh ka jingkyrkhu kaba khraw ïa kane ka Parish, ha kaba ïa kane ka ïingmane ba tymmai la shna da ka jingkyrshàn radbah ki paid U Blei ha ka jingïalam u Sohblei Balestine Marbaniang kum u Nongsharai Rangbah katei ka Shnat Niam bad ruh ba la kyrshan lang ki sohblei synrop u Sohblei Francis Kharpan, Andy Khongjee.
Ha kane ka sngi, ban pynkhraw ïa katei ka sngi jingioh ïingmane ba thymmai la plie bad khap ribon da u Sohblei Balestine Marbaniang Nongsharai Rangbah katei ka shnat niam bad u Archbishop Victor Lyngdoh.
Haba sam ïa ka ktien ka jong u Blei ha kane ka jingkyrkhu ïa ka ïingmane ba thymmai bad ba la pynhap pyrda ïa ka jingrakhe dap 50 snem ka Parish, u Archbishop Bishop Victor kum u kongsan u la kyntu ïa ki paid riewngeit ban imsngi ïa ka ktien U Blei lyngba ki nonglehbha kiba la long ki nongmait shrah ïa katei ka Shnat Niam.
Na ka liang u Archbishop Victor Lyngdoh kum u khlieh ka Jylla Niam Bah Shillong u la ài ka jingkhublei sngewnguh ïa ki Nongsharai mynsiem kiba la sdang ïa Shnat Niam Mawbri naduh U Sohblei Jacob Alluckal bad u Sohblei Thomas Manjally kum u Sohblei synrop ha Ki snem 1972 ba sdang ïa ka Shnat Niam pynsngew u Archbishop Victor Lyngdoh ka Jylla Niam Bah Shillong.
U Lyngdoh Nongsharai Rangbah ka Mawbri u U Sohblei Balestine Marbaniang Khongji, ha kane ka sngi u la pynpaw ka jingsngew nguh ïa U Archbishop Victor Lyngdoh Uba la shim khia ban wan kyrkhu ïa ka ïingmane bad ki Lyngdoh kiba donlang naduh ba sdang ïa ka Shnat Niam uba dei U Nongsharai Rangbah ba Nyngkong eh U Sohblei Jacob Alluckal kum u Maitshrah.
Shuh shuh ka Shnat Niam Mawbri ka long khun Jong ka Shnat Niam Nongpoh mynshwa bad mynta hadien ba ka la ioh la ka Jong ka Shnat Niam ka la Iah ban pynmih shibun Ki Lyngdoh Sohblei bad Ki riewniam ba kynthup ïa u Sohblei Sylbanus Sngi Lyngdoh, U Sohblei Ciryl Lyngdoh kiba la khlad noh, u Sohblei John Madur, Sohblei Pius Shadap bad kiwei kiwei.