Lada nga jied ïa ka pisa ngam don shuh ha ka party Congress: Carness Sohshang
Mawkyrwat, K’lyngkot, 08: Ka India National Congress (INC) jong ka Mawkyrwat block Congress Committee ki la ïoh ban pynlong ïa ka jingïakynduh lang jong baroh ki nongkitkam ba hakhmat na ki unit bapher bapher ha kaba ïa kane la pynlong ha ka ophis treikam jong ka party ha ka jingïadonlang ruh u kyrtong jong ka India National Congress (INC) Mawkyrwat Constituency, u bah Carness Sohshang.
Ha kane ka jingïakynduh da ki hajar ngut ki paidbah ki la wan tuid ban sngap ïa ki jingpynshai ha ka jingïalang ha phyllaw ïing u bah Carness Shohshang, uba long u MDC ka Mawkyrwat Constituency bad kum u kyrtong ha kane ka elekshon MLA mynta u snem na ka Mawkyrwat Constituency South west Khasi Hills District.
U bah Carness Sohshang u kyrtong jong ka Indian National Congress (INC) napoh ka Mawkyrwat Constituency haba kren ha ka jingïakynduh lang jong baroh ki nongkitkam ba hakhmat na ki unit bapher bapher hapoh jong ka ophis trei kam ka party, u la kren da kaba shai, “lada nga jied ïa ka pisa ngam shem la don shuh ha kane ka party Congress”.
Ha ka jingkren jong u ula pynshai shuh shuh ba ka jingïaleh bad ka jingïaineh jong u na kane party congress ka dei ba u ieid ïa ki paidbah ym ïa ka pisa namar shibun ki wei ki party kiba la wan ban tyrwa ïa u da ki klur tyngka ban un ïaleh elekshon ha une u snem ba mynta hynrei ïa kata u kyntait.
Lah ban kdew ruh ba kane ka jingïakynduh lang jong ki nongïalam bad ki nongkyrshan na ka INC ka dei kawei na ki bynta ban pynkhreh, ban pynkhlain shuh shuh ïa ki shnat treikam jong ka party hapoh jong kane ka Mawkyrwat Constituency na ka bynta ka jingjied ïa uta u nongmihkhmat hapoh ka Assembly.
Ha kane ka jingïa-kynduh lang ki nong-kyrshan la ïoh ruh ki jing-kren na ki ‘riew rangbah bad ruh na u bah Carnes Sohshang kiba la pynshai ha ki paibah ïa ka nongrim bad ïa shibun ki mat ki jura ban ïa tai ïa thir na ka bynta kumno ban pynwan dur ha ka rukom kaba dei na ka bynta kane ka shynshar ka khaddar hapoh jong ka districk, ka jylla bad ha ka ri India hi baroh kawei.