Nongpoh, Kyllalyngkot 08: Haba leit ban pynïasoh noh ïa lade sha ka party NPP ha Ri Bhoi District ha ka jingïalang kaba la long ha ka 6 tarik u Kyllalyngkot 2023 ha Umsning, u Bah Donkupar Sumer, MDC barim ka Umsning bad u Working President ka UDP Ri Bhoi uba la mih noh na kane ka party ha khmat ki heh nongïalam ka NPP U la pynpaw ba lada ka NPP ka wan biang ha ka bor synahar kaba hakhmat eh ka dei ban pynurlong ïa ka Central Agricultural University ha Kyrdemkulai.
Kum ban pynkynmaw, u Bah Donkupar Sumer, u dei u nongïalam ka UDP na Ri Bhoi District bad ha kane ka kynti u la hap ban mih noh na kane ka party UDP bad ban pynïasoh noh ïa lade sha ka NPP halor ka nongrim kaba u la pynpaw ba u pyrshah jur ïa ki jingtreikam ki nongïalam ka UDP kiba shu leh don bor khlem da bud ïa ki riti treikam jong ka party.
Ha katei ka sngi, nalor kaba u la ther tyngeh ïa ka jinglong jingman ka party UDP kaba la pait la pra tang na ka daw ki nongïalam, u Bah Donkupar Sumer, u la pynshai paidbah ba mynta um don shuh ha ka party UDP bad u la don hapoh ka sem jong ka NPP party bad ka daw kaba u la phai khmat sha kane ka party, ka dei ruh halor ka nongrim ban wan rah ka jingkylla khamtam ha Umsning Constituency bad ha Ri Bhoi District.
Kawei na ka phang kaba u la kren sha ki paidbah ha katei ka jingïalang, ka dei ka jingangnud ban pynioh noh da ka Central Agricultural University ha Kyrdemkulai, ha kaba dan shen ruh ki nongïalam ka KSU ki la mih ban pyrshah halor ka jingwan iuhkjat u Myntri ka sorkarkmie ba peit ïa ka tnad rep, namar naduh ba sdang ha u snem 2010 la rai ban wan rah ïa ka Central Agricultural University ha kaba haduh 200 akar ka jaka la ai ban thaw ïa kane ka University, hynrei haduh mynta la shu wan rah tang ka College of Agriculture kaba ki nongïalam ka KSU ki la pyrshah jur ba khlem urlong da kata ka University bad tang ka College.
U la ong ruh kumba la thmu naduh kaba sdang ba ka sorkar jylla ka la ai haduh 200 akar ka jaka na ka bynta ban wan rah ïa ka University, hynrei mynta ka dei tang ka College ba la shu peit shu khmih da ka Imphal Central Agricultural University bad lada ym lah hi ban wan rah da ka University ka sorkar ka dei ban shim biang ïa ka jaka lane ban wan rah noh da ka Shillong Medical College namar tang ka College kam donkam ban ioh jaka haduh 200 akar.
U la kren ruh la jin ba ka sorkar ka lah ban wan rah da ka Central Agricultural University ka jingmyntoi kam dei tang ïa ki samla pule ka jylla ban ioh bsuh khlieh ban pyntbid ha ka kam rep ka kam riang, hynrei kawei na ka jingmyntoi ka dei ruh ka jingioh kam ioh jam ki khun samla ka jylla.
Namarkata, kumba u la wan ban pynïasoh sha ka party NPP, u Bah Donkupar Sumer hakmat ki heh nongïalam ka NPP U la pynsngew paidbah ba lada ka NPP ka wan biang ha ka bor synshar ka dei ban pynurlong ïa kane ka Central Agricultural University bad ym tang ka College of Agriculture khnang ba ka jingmyntoi kan long ïa ki nongrep, ki samla bad ha ka jylla hi baroh kawei, u la bynrap.
