Phuh ka jingkynduh lang jong ka Seiñ Kur Shylla ha Byndihati, EJH

0

Khliehriat, K’Lyngkot 08 : Ka Seiñ Kur Shylla Khasi Jaiñtia, myn ha ka 5 tarik mynta u bnai ka la pynlong ïaka Dorbar Pyllun kaba saw ha ka Shnong Byndihati East Jaiñtia Hills District, ha kaba ha kane ka Dorbar Pyllun ka Seiñ Kur Khasi Jaiñtia la wan da ki hajar ngut ki dkhot ka Kur kiba na jan bad kiba na jngai hapoh ka Ri Lum Khasi Jaiñtia kumjuh ruh ki dkhot jong ka kur kiba shong ba sah shapoh ka jylla Assam (Silchar).
U MLA ka thaiñ u bah Kyrmen Shylla uba long ruh u myntri ka jylla u la long u kongsan ha kana ka Dorbar pyllun jong ka kur bad la ïa don ryngkat lang ruh u Waheh Shnong ka Byndihati, kong Santa Mary Shylla, ki Phadar, ki Pastor, ki Lyngdoh, u DM&HO Khliehriat Dr. Domenic Shylla, u BDO Wapung C&RD Block Dr. Tammiyaki Shylla bad kiwei de.
Ia ka prokram la pyniaid da u President Rangbah ka Kur Shylla,u ma Pyrkhat Shylla, ha kaba la pynher ruh ïa ka lama jong ka kur ha shwa ban sdang ka jingialang bad ïa ka Financial Reports & Annual Report la pynsngew da u General Secretary ka kur, u ma Eastenius Shylla, kumjuh ruh la pyllait paidbah ïa ka Calendar jong ka Kur da u Kongsan u ma Kyrmen Shylla. Hadien kane la pynithuh bad pynskhem ïa ka seng samla Kur, la ïoh ruh ïa ki jingkren da ki nongmihkhmat na ki District jong ka West Jaiñtia Hills, South West Khasi, East Khasi District.
U kongsan, u bah Kyrmen haba kren u la ong kumno ban kyntiew ïa ka burom jong ka kur ka dei tang ka ktien ka thylliej kaba don akor bad ka jingsneng jingkraw kaba la ban kyntiew ïa ka nam bad burom jong ka kur, Na ka liang jong u u la kyntu ruh ïa ki khun samla jong ka kur ba kim dei ban long kiba sarong ne sngewmeng, ym dei ban ibeiñ ïa ki riew rangbah bad kumjuh ruh ba ki dei ban long kiba shlur na ka bynta ki kam ba bha.
Shuh shuh u ong ba la don kano kano ka jingeh jong ka kur ka jait un ïai don ryngkat bad un iarap kat kaba kot ka bor na ka bynta ka jingdonkam jong ka kur ka jait, u la pynpaw ka jingsngew kmen bad ong ba katno ka jingsngew sarong ba haduh mynta ka kur ka jait kam pat juh shah kynthoh ne kynnoh, lait tang uta uwei ar kata ka bym lah ban lait.
Ha katei ka sngi ka Seiñ Kur Shylla Khasi Jaiñtia kala pynkup burom ruh ïa u samla Edigio Paia Shylla uba la poi haka kyrdan 16th Position ha ka Eksam SSLC jong u snem 2022.
La pynphuh pynphieng shuh shuh ïa kane ka sngi da ki jingshad jingrwai kiba la shim bynta da ki dkhot ka Kur jong ka East Jaiñtia, Shad tynrai na ki dkhot ka kur na West Jaiñtia, ka Shad Pastieh naka Shnong Byndihati. Haba kut jong ka jingialang u kongsan u la pynhiar ïa ka lama jong ka Seiñ Kur Shylla Khasi Jaiñtia.

Leave A Reply

Your email address will not be published.