Ka Party Congress ka long kum u syntiew ba bun rong ym kumba thmu ka BJP ban pynlong tang shi rong : Rikut N Parien

“Kum ki kyrtong kam donkam satia ban shukor ïa ki paidbah haba pynsngew ïa ki jingkren ha ki jingïalang Election.”

0

Jowai, K’Lyngkot 08 : U ma Rikut N Parien uba dei ruh u President ka 4-MowBlock Congress Committee ha ka jingkren paidbah jong u ha ka jingïalang u ma Nehemayah Tyngkan kum u kyrtong MLA ba la khot pynlong da ka Dorbar 13 shnong ha ka 5 tarik mynta u bnai ha Iooksi West Jaiñtia Hills ula ong ba ka “Party Congress ka long kum uto u syntiew bateh tang shikhum bad uba don shibun ki rong ba itynnad ym kumba long ka sorkar NDA hapoh ka jingïalam ka BJP ban don noh tang shirong”.
Halor kane u ma Rikut Parien ula pynsngew ruh ïa ki aiñ ba kane ka aorkar NDA kaba la dep pass ha nongbha Delhi kaba la tip kum ka ‘Uniform Civil Code’ kane ka mut ban wanrah ïa kawei ka ktien bad kawei ñiam da kaba u kren shai ba kane kan buh jingma haduh katta katta ïa ki jaitbynriew rit paid hapoh ka Ri.
Ula pynkymmaw halor ka jingpass ïa ka aiñ Citizenship Amendment Act (CAA) da ka sorkar NDA hapdeng ki jingpyrshah jur jong kiba bun ba lang, hynrei kane ka sorkar ba mynta kala monjur, wat ka nongmihkhmat na ka jylla kaba dei ka MP na Garo ka ai ka jingkyrshan ïa kane.
Ha ka por Election baroh baroh ki kyrtong ki thaw ïa ki sur jingrwai kiba pynsngew sha ki paidbah ban jied ïa ki nongmihkhmat ki ban ïasait na ka bynta jong ki hapoh ka ïing dorbar thaw aiñ, hynrei ki long pynbna da khongpong ynda kila jop kila leit shong klikti hapoh ka dorbar bad klet lut ïa ka nongrim ban ïada ïa ki paidbah, ula kynthoh ruh ba kam don jingmut satia ban sah ha ki ïing paki dulan ynda la mih pat nala ïing la hap ban pynbiang ryngkat ki Security ban pahara, ong ba Parien.
Kum ki kyrtong kam donkam satia ban shukor ïa ki paidbah haba pynsngew ïa ki jingkren ha ki jingïalang Election, hynrei kum ki kyrtong donkam ban pynsngew ïa ka nongrim kaba shisha bad ka ban treikam na ka bynta jong ki”. Shuh shuh ula ong “balei mynta kila mih kita ki High Level bad ki Low Level” ha ka por jong kane ka sorkar MDA ba mynta bad kaba lehbor wat ïa ki nonghikai ruh la pynthiah ha surok bad kawang da ki tiar pynsat khmat.
Ula kynthoh ruh ïa ki kam tuh kiba la leh hapoh ka sorkar MDA ha ka por jong ka jingïakhun ïa ka khlam Covid-19 wat lada ka dei jylla ba rit ruh ka jingpyllut jong ka kynjoh sha ka 816 klur 22 lak 52 hajar 312 tyngka. Ha ka liang ka bording (MeECL) ruh kane ka sorkar kala pynjah ïa ka pisa kaba la kot da ki hajar klur.
Ula kyntu ïa ki paidbah nongthep vote ka 4-Mowkaiaw ba kin long kiba husiar ha shaw ka jingïathep Vote da kaba kiar na ka jingshah pynbam pisa ha kiwei pat ki kynhun seng saiñ hima sima namar kane ka lah ruh ban pynjot pynpar syndon ïa ka jaitbynriew.

Leave A Reply

Your email address will not be published.