Jowai, Risaw 22: Ka Krishi Vigyan Kendra (KVK), Jaiñtia Hills, ha ryngkat ka jingïatreilang bad ka ophis District Agriculture Officer (DAO), ka District Horticulture Officer (DHO) bad ka Research Officer, West Jaiñtia Hills, mynta ka sngi ki la sdang ïa ka prokram ai jinghikai sha ki nongrep ne ka ‘Khet Bachao Abhiyan – Rabi 2026’ ha Training Hall jong ka Horticulture Hub, Thadlaskeiñ, West Jaiñtia Hills District.
Haba ai jingkren ka Dr. D. Rymbai, Senior Scientist & Head, KVK Jaiñtia Hills kala pynsngew halor ka jingthmu jong kane ka prokram ‘Khet Bachao Abhiyan Campaign’, khamtam eh la batai ïa ka jingkordor jong ka aiom ot (rabi) bad ban kyntiew ïa ki rukom rep jong ki nongrep ka thaiñ.
U ma L. Phawa, District Agriculture Officer (DAO), West Jaiñtia Hills, ula pynshlur ïa ki nongrep ban pyndonkam hok ïa ki Soil Health Card bad ka rukom pyndonkam ïaka sboh dawai. Ula kdew ruh halor ka jingshah jied ka Jaiñtia Hills District hapoh ka Pradhan Mantri Dhan-Dhaanya Krishi Yojana (PMDDKY) bad ula ban jur ïa ka jingdonkam ban kyntiew ïa ka jingpynbha ïaka rep ka riang haka aiom ot (rabi) hadien ba la dep ot ïa u kba.
Ka kong S. Kynjing, District Horticulture Officer (DHO), West Jaiñtia Hills kala kren halor ka Viksit Bharat bad ka jingpyrshang jong ka Sorkar Pdeng ban pynkiew ïa ka rep ka riang khamtam eh ïaki jingthung haka aiom ot, la kyntu ban kiar na kaba pyndonkam palat ïa ki sboh dawai bad ki dawai pynïap khniang ban ïada ïa ka jingbha jong ka khyndew.
Naka liang u kongsan Dr. H. Niang uba dei u Block Development Officer (BDO), Thadlaskeiñ Block, West Jaiñtia Hills District ula ban jur halor ka jingdonkam ban pynneh pynsah ïaka khyndew ba bha bad ban kyrshan ïa ki nongrep kum ki sienjam ba donkam eh ban pynkiew ïaka Ri India.Ula maham ruh halor ka rukom pyndonkam ïa ki dawai pynïap khniang, kiba lah ban ktah jur ïa ki jingri, ki sim ki doh bad kiwei de ki mrad ki mreng bad kaba lah ruh ban pynjaboh ïa ka mariang sawdong.Ula pynshlur ïa ki nongrep ban ki tip kumno ban rep katkum ka jinglong ka khyndew.
Hadien kane ka jingïalang la ïalam ïa ki nongrep sha ki jaka ban pyni ïaki rukom rep ha ki Unit bapher bapher haka Horticulture Hub, Thadlaskeiñ. La pynlong ruh ïa ki jingpyni halor ka jingpyndonkam ïa ki dawai pynïap khniang bad batai halor ka jingïadei ka mariang bad ki jingthung.
La wan ban ïashim bynta ha kane ka prokram da ki ki nongrep bad ki heh sorkar kum ka lad ban pynsngewthuh shaphang ki skhim rep, ka jingpynbha ïa ka rukom thung jingthung katkum ka juk stad, ka jingbha jong ka khyndew bad ki rukom rep kiba juh rep man ka por hapoh ka Jaiñtia Hills.
