Shillong, Kyllalyngkot : Shibynta pynurlong ïala ka kular, u MLA ka Mawlai u Bah PT Sawkmie ha ka 6 tarik, Kyllalyngkot 2023 u la aiti ïa ka work order ba 10 lak tyngka na ka bynta ka jingtei ïa ka community hall jong ka shnong Mawlai Kyntonmassar ha ka jingdon ryngkat u rangbah shnong Dr. Marco Mitri, ki rangbah dong, ki nongkitkam shnong, ki riew rangbah, ki longkmie bad kiwei kiwei.
Ha kane ka juh ka sngi u MLA u aiti ruh ïa ki tiar shet tiar tiew, ki syntek, ki tyrpar bad ki top syntek na ka bynta saw tylli ki dong kiba don ha Kyntonmassar.
Haba ai jingkren u Bah PT Sawkmie u pynpaw ka jingsngewkmen ba u la ïoh ban pyndep kumba la kular ïa ka shnong Mawlai Kyntonmassar ban ai ïa ka 10 lak bad kumjuh ïa ki tiar ki tar.U pynpaw ba ha kine ki san snem ba la leit watla u don ha ka liang pyrshah u la pyrshang bha ban leh kaei kaba bha na ka bynta ka thaiñ bad na ka bynta ka jaidbynriew.
Nalor kata ula ong ba u khmih lynti lada u jop biang da ka jingisynei U Blei, un don ha ka bor khnang ba un ïoh ban trei kham bha ïa ka Konstitwensi. U MLA ula ong ruh ba ka Trinamul Congress (TMC) ka la kular ban ai mar 1000 tyngka man la u bnai, lada wan ha ka bor, ma u ruh un palat ïa kaei kaba ka TMC ka ai, kaba lah ban long mar 10,000 tyngka na ka bynta ki tymmen ki kro, kiba la shong penshon bad kiba duk basuk, lada u jop bad don ha ka bor.
Katba na ka liang u rangbah shnong u Dr. Marco haba kren maitphang u la pynpaw ba ki la die ïa ka ïingshnong barim ha ka dor 27 lak bad ki la tei ïa ka ïingshnong ha Umshing sohlang ha ka jaka ba la noh synñiang da ka kur Malngiang.
U iathuh ruh ba dei tang u Bah PT Sawkmie uba la noh synñiang na ka bynta kane ka ïing shnong bad ym don da kiwei pat. Ka kyrteng jong u Bah PT Sawkmie mynta kan sahkynmaw na ka bynta ka shnong Kyntonmassar.
Ha kajuh ka por u la ai khublei bad pynpaw ka jingsngewnguh ïa u MLA ha kaba ïa dei bad kane.“Ngi pdiang kum ka jingai sngewbha snem thymmai ïa kine ki jingai u MLA,” ong u rangbah shnong.
Ha kane ka sngi la ïoh ruh ka jingkren na bah Homer Kharkongor, President ka UDP Mawlai Circle, bah Teibok Kharkongor, Secretary UDP Mawlai Circle, na assistant rangbah shnong bah G. Kharkongor bad kiwei kiwei.
