Jowai, Risaw 23: Ka Pnar Students’ Movement (PSM), Jowai Circle, mynta ka sngi Thohdieng kala leit ban ïakynduh ïa u Executive Engineer ka MePDCL, Jowai ban aiti ïa ka dorkhas halor ka jingkiew palat pud jong ka bai bording light ha sor Jowai.
Ha kane ka jingïakynduh, ka seng hapoh ka jingïalam jong u Vice President u Arlangki Sajem lem bad ki dkhot, ki la pynsngew ïa ka jingud jong ki paidbah halor ka jingkiew palat pud jong ka bai bording ha sor Jowai. Ka seng ka la pynpaw ruh ba don ki longïing kiba ym pyndonkam satia ïa ka bording elektrik katkum ki bnai kiba la leit, hynrei ki dang ïoh ïa ka bill kaba long kumjuh.
Na ka liang ka seng, ka la kyntu ïa ki nongpynpoi bill bording ba kin peit bniah bha ïa ki meter shwa ban sam ïa ki bill sha ki paidbah, khnang ban lait na ka jingktah ïa ki longïing kiba bun hapoh sor Jowai.
Na ka liang u Executive Engineer ka MePDCL, u la kular ban peit bniah ïa kane ka kam, khnang ban pynbeit ïa kane ka jingeh bad ban lait na ka jingktah ïa ki paidbah. U la kular ruh ban bthah ïa ki nongpynpoi bill bording ba kin peit bniah bha ïa ki meter shwa ban sam ïa ki bill sha ki paidbah.
Ha kaba kut, ka PSM kala kyntu jur ïa ka ophis ba kan shimkhia ïa kane ka kam bad ban pynthikna ba kum kine ki jingeh kin ym jia shuh ha ki por ban wan. Ka seng ka la maham ruh ba lada ka ophis kam shimkhia ban pynbeit ïa kane ka jingeh, kan sa pyrkhat da kiwei pat ki sienjam ban leh.
