Nalor ka jingïakynduh ki para samla Khasi, sei ka KSU da ki nongïalam hapoh ka RIST-USTM

0

Nongpoh, Risaw 04: Ban lum lang ïa ki para samla Khasi kiba pule hapoh ka skul bah RIST-USTM, Baridua, Khanapara ha Ri Bhoi bad ban peit lem ïa ka eh ka shong ki samla pule Khasi, ka Khasi Students Union (KSU) mynta ka sngi nalor ka jingïakynduh lang jong baroh ki samla pule Khasi ha katei ka skul bah ka la lah ruh ban sei da ki nongïalam ba pura ka KSU, RIST-USTM Unit.
Ha kane ka jingïakynduh lang ki samla pule Khasi ha katei ka skulbah ban wan rah ka jingïatylli bad ka jingïa ithuh ithaw hapdeng ki samla Khasi, ka KSU mynta ka sngi ka la lah ruh ban pynskhem ïa ki nongïalam ka KSU, RIST-USTM Unit ba la wan ban pynskhem bad pynbam smai da u President ba rangbah ka seng, u Samla Lambokstarwell Marngar.
U Samla Lambok starwell Marngar u la wan ruh ban shim bynta kum u kongsan ban ai mynsiem ïa ki samla Khasi ba pule ha katei ka skul bah bad la sakhi lang ruh da ka jingdon lang u Samla Raymond Kharjana, Education Secretary ka seng kmie kum u symbut kongsan bad ryngkat ka jingdon lang ki nongïalam ka KSU, North Khasi Hills District Unit.
Haba kren ha kane ka jingïalang, U Samla Raymond Kharjana u la buh ïa ki ar tylli ki jingkylli haki Samla da kaba ong “Haba phi wan hangne phi dei ban kylli da lade ïalade balei phi wan hangne bad kaei phin rah nangne?, haba phi wan hangne phi dei ban sngewthuh ba ka bun ka jinglut kumta phi dei ban long kiba trei shitom bad kiba shimkhia haki jingpule ki jong phi namar ba phin ïoh ban pule hangne katno ki Kmie ki Kpa ki trei shitom na bynta jong phi.
Ka phang kaba ar kaba la kren ka long ba ki samla pule ki dei ban sngewthuh kaei ba phin rah nangne bad ban synñiang sha ka Jaidbynriew namar ka burom kaba kham khraw kam dei ka jingïoh Gold Medal jong phi hynrei ka burom kaba phin wanrah bad ban ai sha ka Jaidbynriew”
Na ka liang u u Samla Lambokstarwell Marngar haba kren ha kane ka sngi, u la ai mynsiem ïa ki samla pule da kaba ïathuh shaphang ki jingïaleh jong ka KSU na ka bynta ka Jaidbynriew haki snem kiba la leit bad dei lyngba kine ki jingïaleh kiba la pynlong ïaka Jaidbynriew jong ngi ban ïohbat ïa u lakam synshar hapoh ki Shnong ki thaw kum ki thaiñ Jaiaw, Mawlai bad kiwei kiwei ki jaka.
U la pynpaw ruh dei lyngba ka jingïaleh ka KSU, kane pyni ïa ki soh kiba ka KSU ka sei’. U Samla Rangbah u la ong ruh “kum ki Samla ki dei ban trei shitom bad phim dei ban shah rem haka jingïaleh ka jong phi kum ki samla pule”.
Haba pynkut, u la ong ba kum ki Samla dei ban im tip briew tip Blei bad ban wanrah ka burom ïaka Ïing, ka Shnong, ka District bad ïaka Ri bad ka Jaidbynriew hi baroh kawei, “ynda phi la pass nangne ka burom kaba kham khraw ka dei ka burom kaba phin ïoh ban noh synñiang sha ka Ri bad ka Jaidbynriew baroh kawei”, u la bynrap.
Lyngba jong kane ka sngi, ka KSU ka la pynkup burom ruh ïa ki Nongkitkam barim ka KSU RIST-USTM Unit kiba la shakri na ka bynta ka bha ka miat ki samla pule hapoh katei ka skulbah.

Leave A Reply

Your email address will not be published.