Ha shrip ki pulit ngat 3 ki nongkhaii drok, kurup drok Heroine ba shongdor kumba 1 klur

Nongpoh, Risaw 04: Ki pulit jong ka Ri-Bhoi hynnin ka janmiet kila ioh ban kem 3 ngut ki nongkhaii drok naka jylla Nagaland bad Manipur bad ioh ruh ban kurup ïa u drok Heroine naka met jong ki ba shongdor kumba 1 klur.
Katkum ka khubor bala ioh lum naki pulit la ïathuh ba ki pulit ka Ri-Bhoi hadien ka jingioh jingtip kaba thikna ba ka don kawei ka longkmie kaba wan naka jylla Nagaland da ka jingthmu ban khaii drok sha Nongbah Shillong bad ïaid lynti na Ri-Bhoi, ki pulit kila pynlong ka jingpynap shrip ha Byrnihat bad dei haka por 4:45 janmiet ba ki pulit kila bat ïa kawei ka taxi kaba la suba ba shong da katei ka longkmie.
Haka jingtalasi bad tohkit jong ki pulit kila ioh ban kurup ïa u drok Herione na katei ka kali, bad naka liang ki pulit kila kem ruh 3 ngut ki briew ba don ha katei ka kali bad kurup ruh 3 tylli ki mobile phone ba ki pyndonkam.
Kitei ki 3 ngut bala ioh kem da ki pulit la tip kyrteng kum u Kaisikamo Chawang naka jylla Nagaland, ka Adaliu Chawang naka jylla Manipur, bad ka Wijiulungtiu Panmei naka jylla Nagaland, na ka liang ki bor pulit ka Ri Bhoi ki la dep ban register case katkum ka NDPS act bad ka jingtohkit halor kane ka jingioh kem ïa kitei ki 3 ngut ka dang ïaid shakhmat ban leh katkum ki kyndon ka aiñ bad ban lap shuh shuh ïa kiwei kiwei ki donkti.