Na Moscow sdang pawnam u nong Shillong kum u Master Chef ha New York

Shillong, Naitung 16 : Uwei na ki Master Chef ne u nongshet ba pawnam ha sorbah New York, USA u dei uba la heh la san ha Shillong, kata ha Mawkhar, Mission Compound.
Ïa kane, utei u nongshet u la ïathuh haba kren bad ki lad pathai khubor ha ka jingwan jong u sha Shillong ban shim bynta ha ka prokram ba pynlong da ka NPP Shillong North.
U Chef Tenzing Tsering u la sdang ban pawnam hadien ba u la ïoh ban khur ïa ka takma ksiar lane ka Gold Medalist ha jingïakob shet ba tip kum ka ‘Golden Hand Centre’ cheff kaba la wan ban shim bynta da ki nongshet ba pawnam na ki 72 tylli ki ri jong ka pyrthei kaba long ha Moscow ha u snem 1998.
Mynta, kum u dkhot jong ka American Culinary Federation, NY USA bad jong ka World Association of Chefs Societies utei u rangbah u la pynkynmaw ruh ïalade kumno kum u samla ba pyndep ïa ka Commerce na St. Anthony’s College Shillong u la iehnoh ïa kam nonghikai Mathematics ha Karnataka, bad ruh ïa ka kam u Accountant ha Nepal ban leit trei ïa ka kam kaba u thrang naduh ka mynsiem.
Haba ïathuh khyndiat shaphang ïalade, u Chef Tenzing u la ïathuh ba ïa u la kha bad u la heh la san ha Mission Compound, Shillong bad hadien ba u la pyndep ïa ka jingleit skul ha Dehradun u la wan ban pyndep sa ïa ka Graduate ha ka Commerce na St. Anthonys College Shillong ha u snem 1998. U la ïathuh ruh ba ka kmie jong u kadei ka Tibetan katba u kpa u dei u Khasi.
Nangta u la ïathuh ruh ba mynta u don la ka jong ka jaka bam kaba paw kaba tip kum ka Punda Tibetan Restaurant ha New York. U la ïathuh ruh ba dei hadien lai snem ba u don ha Russia, u la ïoh pat ban leit shet ha Siberia, Paris bad khatduh ha New York.
Haba jubab ïa ka jingkylli kumno u poi sha katei ka kam bad poi ruh haduh ka kyrdan kum u master cheff utei u rangbah u la ïathuh ba naduh dang rit u ju smat ban ïarap ïa ka kmie ha restaurant ban shet jingshet bad u la ju trei teng ruh bad kawei ka dhaba kaba don ha surok bah Shillong – Guwahati kum u nongsait tiar.
“Hynrei kine baroh ki la kylla hadien ba nga la ïoh ban khur ïa ka takma ksiar ha ka jingïakob shet kaba long ha Moscow ha u snem 1998 kaba la wan ban shim bynta haduh 72 tylli ki ri. Dei katei ka jingjop kaba la pynshlur ïanga ban jied ïa ka kam kum u nongshet” u la ong.
Nangta u la ïathuh ruh ba kumno uwei na ki Mayor ha Russia u da ïaroh haduh katta katta haba u ïoh ban mad ïa ka jadoh bad ka dohkhlieh kaba u shet.
“U la ïaroh ïa ka jingbang ka rukom bam ki Khasi bad nga la ïathuh ruh ha u ba katei kadei ka jingbam na ka ri kaba jur tam u slap.” Nalorkata, u la ïathuh ruh ba u ju pyrshang beit ban shet ïa ki jingbam khasi haba u ïoh lad khamtam eh ha ki tamasa kiba heh.
“Watla kam dei ka kam kaba suk ban leh man ka por hynrei nga ïai pyrshang haba don ka lad,” u la bynrap biang.
Haba kren pat halor ka kam ba u trei, u Tsering u la ong ba ki don ar jait ki nongshet (chef), kata uwei uba trei tang ban ïoh kamai pisa bad uwei pat uba shet da kaba buh hakhmat ïa ka koit ka khiah ki briew.
“Nga dei u nongshet uba kham sngewkhia ban ai ka bam kaba koit kaba bha namar hanga ka jingkoit jingkhiah kadei kaba kongsan,” u la ong. Ha kajuh ka por, u la ïathuh ruh ba u dei u nongsumar ba la tbit bha (ayurveda) ha New York bad u ju pynlut por ruh katto katne kynta man ka sngi ban sumar briew khlem da shim pisa.
“Nga sngewtynnad ïa ka ayurveda namar kadei ka rukom sumar hyndai ban pynkoit ïa ki jingpang naduh tynrai. Naduh mar ïa poi ha Shillong ruh nga la sdang ïa kane ka rukom sumar khlem da shim pisa,” u la ong.
Haba kylli kaei ka khubor kaba u kwah ban ai sha ki khun samla jong kane ka jylla, utei u rangbah u la ong, “Wat ju kynran dien noh tang shiteng por haba phi kwah ban poi sha ka thong. Kut jingmut haladen namar dalade nga ïohi ba bun ki samla jongngi ki sangeh noh tang shiteng lynti. Wat manga ïalade ruh lada dei ba nga sangeh noh shiteng lynti ngan ym poi kumba nga long mynta,” u la bynrap biang.