Na Mawkyrwat sdang ka KSU ïa ka jingïalang paidbah ban pynshai ïa ki 5 tylli ki mat jingdawa na ka sorkar

Mawkyrwat, Nailar 10, 2026: Ka Khasi Students’ Union (KSU), South West Khasi Hills District, ha ryngkat bad ka Khasi Students’ Union, Central Executive Council, mynta ka sngi ka 10 tarik u Nailar, 2026, ka la pynlong ïa ka jingïalang paidbah hajan ATM kaba don ha Ïew Mawkyrwat, ban pynsngew paidbah bad ïatai halor ki san tylli ki mat jingdawa kiba ka seng ka la buh hakhmat ka Sorkar Jylla bad kiba ïadei bad ki mat kiba ktah ïa ka jylla bad ïa ki paidbah.
Ha kane ka jingïalang paidbah, la ïadonlang ruh ki nongïalam ba hakhmat jong ka Khasi Students’ Union, Central Executive Council, kiba la ai jingpynshai bad kren halor ki mat jingdawa bapher bapher kiba ka seng ka la buh hakhmat ka Sorkar.
Ki san tylli ki mat jingdawa jong ka KSU ki kynthup ïa ka; ban pyndam noh ïa ka Public Hearing jong ka Shree Cement, ban suspend noh ïa u Deputy Commissioner (DC), Superintendent of Police (SP) bad ki ophisar jong ka Meghalaya State Pollution Control Board (MSPCB), ryngkat bad ka jingpynlong ïa ka departmental proceeding pyrshah ïa ki, ban pynurlong noh ïa ka Meghalaya Residents Safety & Security Act (MRSSA), 2016.
Nangta, ban pynurlong noh ïa ka jingpynkylla (Amendment) ïa ka Meghalaya Identification, Registration (Safety & Security) of Migrant Workers Act, 2020, ban pynbeit noh ïa ki jingeh kiba mih ha ka rukom thungkam ha NEIGRIHMS, katkum ka jingkular ba la ai bad ban pyntreikam ïa ka rukom thungkam kaba shai, kaba hok bad kaba khuid, kaba kynthup ïa ka jingpynduh noh ïa ka Personal Interview; ban wanrah jingpynkylla ha ka rukom treikam jong ka Meghalaya Public Service Commission (MPSC) bad ka District Selection Committee (DSC); bad ban thaw ïa ka Standard Operating Procedure (SOP) na ka bynta baroh kiwei pat ki Recruitment Board.
Ka KSU ka la pynpaw ba kane ka jingïalang paidbah ka long kawei na ki sienjam jong ka seng ban pynsngew ïa ka sur jong ki paidbah bad ban kyntu ïa ka Sorkar Jylla ba kan shimkhia bad shim ïa ki sienjam kiba donkam halor kine ki mat jingdawa. Ka seng ka ong ruh ba kine ki mat ki don ka jingïadei kaba khraw bad ka bha ka miat jong ki nongshong shnong bad ka jingmyntoi jong ka jylla hi baroh kawei.
Ym tangkata, ha kaba ïa dei bad u marpoh khyndew ne u Uranium, ka seng hi ka kren da kaba shai ba ko sorkar wat kular tang da ka ktien lyngba ki jingthoh hynrei ka dei ban pyni da ki kam khnang ba kane ka kitab jong ka jingplie ïa u uranium kan dam noh shyndon. Shuh shuh ki la buh ruh ka jingkyrpad ïa ka sorkar ba kam dei ban shu kren ban pynpaw sha ki paidbah ne sha ki dkhot jong ka KSU hynrei ki dei ruh ban da leit syndon haduh ka PMO ne Prime Miniter Office khnang ba ki paidbah kin don ka jingshaniah halor kane ka mat.
Ki nongkren ha kane ka sngi ki kynthup ïa u Bah Shemphang Nonglang, Vice President, KSU South West Khasi Hills District, u Bah Forwardman Nongrem, President, KSU South West Khasi Hills District, u Bah Sandy Sohtun, Assistant Organising Secretary, KSU Central Executive Council bad u Bah Pynshaiborlang Rani, Assistant General Secretary, KSU Central Executive Council.
Ïa ka jingïalang la pynïaid da u Bah Plosborlin Kharjahrin, Environment Secretary jong ka KSU, South West Khasi Hills District.