Pan kaiphod ka ïingbishar High Court halor ki koidi tymmen hukum pyllait ïa ki u nong Bangladesh

Shillong, Nailar 10 : Ka ïing Bishar High Court jongka jylla mynta ka Lah Sngi U Blei ka la hukum ïa ka sorkar jylla ba kan pyllait ïa u koidi nong Bangladesh uba la dep pyndep ïa ka por shong phatok jongu bad ha kajuh ka por ka la pan kaiphod ruh halor ka jingdon ki koidi ba la tymmen hapoh phatok jongka jylla.
Ka Division Bench jongka Chief Justice Revati Mohite Dere bad Justice W Diengdoh ka la shong bishar ïa ka mukotduma ba la ujor da u Registar General halor ka jingdon ki koidi ba la 70 snem ka rta ha ki phatok jongka jylla.
Kat kum ka kaiphod ba la ai da u Advocate General A Kumar ki don haduh 18 ngut ki koidi kiba don hapdeng ka rta 70-81 snem ha ki phatok ha kylleng ki district jongka jylla. Kane ka jingpan kaiphod ka kythup ïa ki case ba la pynngat ïa ki, ka por ba kin shong phatok bad kumjuh ruh ka jinglong ka koit ka khiah jongki.
Ka ïing Bishar ka la lap ruh ba arngut ki nong Bangladesh kiba la shah kem bad shah set kat kum ka Foreigner Act ki dei kiba la tymmen hapoh phatok bad uwei u la kut ka por shong phatok jongu.
Kumta ka ïing Bishar ka la hukum ba dei ban pyllait noh mardor ïa u ne bad buh ha ki jaka sumar tad haduh ba u Assitant High Commissioner jongka Bangladesh un pyndep ïa ki kot ki sla halor ka jinglong trai ri Bangladesh jongu.
Halor kane u Advocate General u la pan bor ban wat bniah halor kine ki koidi nong Bangladesh.
Ka kaiphod ka la pynpaw ruh ïa ki kyrteng jong ki san ngut k i koidi kiba la tymmen kiba la phah na ka bynta ban bishar ban pyllait noh ïa ki bad sa sawngut kiwei ruh yn dang phah tang shu la kut ka por.
Namar ym shym la kdew shai ha ka kaiphod la ïa kane ka jingkyrpad la pan da ki koidi kumta ka ïing bishar ka la bthah ïa u Member Secretary ka Meghalaya State Legal Services Authority ban thung ïa u Nodal Officer bad ban ai ïa ka jingtip kaba bniah ha ka sien bishar ban wan ka ban long ha ka 2 tarik Nailur 2026.