Shillong, Nailar 10 : U Lat ka Meghalaya, u CH Vijayashankar ha ka sngi Nyngkong u la sam ïa ki iitkhmat (Smart Glasses) sha 13 ngut ki briew kiba don ka jingduna ka bor ïohi kiba dei na ka jylla ha ka jingïalang kaba long ha Lok Bhavan, Shillong.
Ha kane ka jingïalang la wan ïadonlang ruh u HC Chaudhary, IFS, Additional Chief Secretary jong u Lat ka Meghalaya, bad u Bah L Kynjing (MCS), State Commissioner na bynta ki briew kiba don jingthut ha ka met (PwDs), Meghalaya.
Ïa kane ka prokram la pynlong da ka jingïatreilang hapdeng ka Voice of Specially Abled People (VOSAP) bad ka Composite Regional Centre for Skill Development, Rehabilitation and Empowerment of Persons with Disabilities (CRCSRE), Shillong. Ka thong jong kane ka prokram ka long ban ai jingïarap ïa ki briew kiba duna ka jingïohi lyngba ka jingsam ïa ki Smart Glasses, kiba lah ban jingïarap ïa ki ha ki kam ba man ka sngi.
Na ka liang u Pranav Desai, Founder jong ka VOSAP, u la kren halor ka jingthmu bad ka thong jong ka Voice of Specially Abled People (VOSAP) ha Meghalaya. Katba u Dr. Uttam Ojha, Advisor jong ka VOSAP, u la ai ïa ka jingkren lamphang haba ïadei bad katei ka prokram ha kane ka sngi.
Ha ka jingkren, u Lat u la ai jingïaroh ïa kane ka sienjam bad pynpaw ïa ka jingdonkam ban ai jingïarap ïa ki briew kiba don jingduna ha ka met, khnang ban pynkhlaiñ ïa ka jingïashim bynta bad ka jinglaitluid jong ki ha ka imlang sahlang.
U Lat u la ai jingïaroh ruh ïa ki jingpyrshang jong ka VOSAP bad kyntu ïa ki kynhun bad ki seng bapher bapher ba kin shim kham bun ki sienjam ban kyntiew ïa ka jingim jong ki briew kiba don jingduna ha ka met ha Meghalaya.
U Dr. Ram Shakal Sahani, Director jong ka CRCSRE-Shillong, u la pyntip ba ha Meghalaya la antad ba don palat 6,000 ngut ki briew kiba duna ka jingïohi. Kawei ka Smart Glass ka kot kumba 18,000 tyngka, bad lada yn ai ïa kine ki Smart Glasses sha baroh ki briew kiba donkam ha ka jylla, yn donkam ïa ka pisa kaba la antad kumba 10.80 klur tyngka ei ei.
Kane ka sienjam ka long kaba kongsan ban pynpoi ïa ki tiar teknoloji kiba lah ban jingïarap sha ki briew kiba duna ka jingïohi, khnang ba kin lah ban im kham laitluid bad ban ïashim bynta kham bha ha ka imlang sahlang.
Kane ka jingïalang ka la long ruh ka lad ban pynpaw ïa ka jingïarap bad ka jingsngewlem ïa ki briew kiba duna ka jingïohi, bad ban kyntiew ïa ka jinglah ban ïoh jingïarap, ka jingïashim bynta bad ka jingpynkhlaiñ ïa ki briew kiba don jingduna ha ka met.
