Lah ban ïoh ka Meghalaya khambun ki ïew khappud lyngba ka kaiphod ka Parliamentary Committee

Shillong, Nailar 10 : Ka Meghalaya ka lah ban ïohi ïa ka jingmih kham bun ki ïew Khappud ne ‘Border Haat’ da ka jingai kaiphod ba biang jong ka Parliamentary Committee ban nang pynbun ïa ki ïew khappud ka India-Bangladesh ban kyntiew ïa ka khaïi ka pateng ki trai shnong, ka kamai kajih bad ka jingïadei hapdeng ki nongshong shnong na baroh arliang.
Ka kaiphod ba 15 jongka jong ka Parliamentary Standing Committee on External Affairs (2025-26), ba la wanrah ha Lok Sabha ha u bnai bala dep, ka la kdew ïa ka bynta jong ki ‘Border Haat’ ha Meghalaya bad Tripura kum ki rynsan ki nongshong shnong ban pynïaid ïa ka khaïi ka pateng para ma ki bad ka jingïasam jingtip ïa ka kolshor.
Ka Committee, kaba bishar ïa ka “jingïadei ba hadien habud hapdeng ka India-Bangladesh” ka ong ba ki kam jngohkai bad ki khaïi pateng na ki shnong khappud ki lah ban shim ïa ka bynta kaba kongsan bha ha ka ban pynkhlaiñ ïa ka jingïadei hapdeng ki imlang sahlang, ka ïoh ka kot bad ka kolshor hapdeng ki artylli ki ri.
Ka la kren kyrpang bad ai jingïaroh ïa ki Border Haat kiba don ha khappud Meghalaya-Bangladesh bad Tripura-Bangladesh, haba pynpaw ba ki dei kiba la pynwandur ban kyntiew ïa ka kamai kajih ki briew kiba shong ha ki jaka ba kyndong eh jong baroh arliang.
Ka Committee kala ai jingmut ïa ka Ministry of External Affairs ban leh ïa ka jingwad bniah ha ka ban nang pynbun shuh shuh ïa ki Border Haat, haba pynpaw ïa ka jingkyrmen ba ka jingpynbun ïa ki kan pynim ïa ka ïoh ka kot ki jaka khappud bad pynkhlaiñ ïa ka jingïadei hapdeng ki briew kiba sah ha khappud.
Ka Sorkar kala pynpaw ba ka la shimkhia ïa ki jingai jingmut bad mynjur ba ki Border Haat ki la ïarap ban kyntiew shisha ïa ka khaïi ka pateng bad ïa ka jingim ki briew kiba shong ba sah ha khappud.
Kat kum ka jingong ka Sorkar, hynriew tylli ki Border Haat kila treiikam ha shilynter ka khappud India-Bangladesh hashuwa u bnai Nailar 2024, bad ki dang don ruh ki Border Haat kiba dang ïaid ha ka jingpyntrei mynta. Haba ïadei bad ki ïew thymmai, ka Sorkar ka pyntip ba ka dang don mynta hapoh ka jingïakren bad ka Bangladesh.
Hynrei, ka jingpynbun ïa ki Haat kan shong eh ha ka jingïakren bad ki Sorkar Jylla, ka jingdon ïa ki jingtei bad ka jingïamynjur lang hapdeng ka India bad ka Bangladesh, ong ka Sorkar.