Ka lad kaba biang eh dei beit ban pynsangeh shipor ïa ki sniang kiba wan nabar Jylla: SSSS

Mawkyrwat, Nailur 15: Ka Synjuk ki Seng Samla Shnong jong ka South West Khasi Hills District lem bad ka ophis jong ka District Animal Husbandry & Veterinary, South West Khasi Hills District ryngkat ki nongri sniang mynta ka sngi jong ka 15 tarik ‘Nailur, 2026 ki la pynlong ïa ka jingïathir halor ka jingjur ka jingwan lynshop jong ka khlam sniang.
Ha kane ka sngi, ki nongwan ïashimbynta ki la ïoh ban ïathir bad ïa kren ïa shibun ki bynta kiba ïadei bad ki lad kumno ban ïada na ka jingwan lynshop jong ka khlam sniang bad ki jingai jingmut ruh na ki ophisar jong ka tnad treikam ba dei peit ïa ki mrad ne ka District Animal Husbandry & Veterinary.
Hadien ba kut jong ka jingïathir jingmut, u bah Walambok Syiemiong uba dei u nongaibuit jong ka Synjuk ki Seng Samla Shnong, South West Khasi Hills District haba kren ha ki lad pathai khubor ula ong ka synjuk ryngkat bad ki nongri sniang kin sa leit ban buh jingthoh ha ki bor kiba halor, halor kane ka kam ban pynsangeh noh shwa shipor ïa ki sniang kiba wan nabar ban pynrung ha ki ïew ki hat jong ka South West Khasi Hills District namar ki dang don bun ki shnong hapoh distrik haduh mynta ki dang lait bad kim bym da shah ktah ne ka jingïap khlam jong ki sniang.
“Namar kumba lah ïoh jingtip, ba kane ka jingshitom ne kem pang jong ki sniang haduh mynta ym pat lah ban sumar ne ïada ïa ki hynrei ka lad ban ïada ka dei beit ban pynsangeh shipor ïa ki sniang kiba nabar khnang ban ïada ïa ki sniang kiba dang don bad ki bym pat ïap ne shah ktah.
Shuh shuh na ka liang ki ophisar jong ka veterinary ruh ha ka jingkren jong ki, ki la ai jingmut ïa ki nongri jingri khamtam ïa ki nongri sniang ba ki dei ban phah ai tika ïa ki khun sniang naduh ba ki dang rit khnang ban lait na kine ki jingshitom. Ki la kyntu bad ai jingmut ruh ba ki dei ban registration ïa ki sniang khnang ban ki ïoh ki lad jingïarap lada jia ba ki sniang jong ki ki ïap bad lada ka wan ka jingshitom hadien habud.