Buddien ka KSU bad lap ba ka PWD ka la ujor ejahar ïakiba donkti khlong ïa ka surok ha Elaka Nongkhlieh

Khliehriat Nailur 15: Ka Khasi Students Union East Jaiñtia Hills District Unit hapoh ka jingialam u General Secretary, u bah K.S.Suchiang, mynta ka sngi ka la leit ban buddien na u Executive Engineer ka tnat PWD Khliehriat Division halor ka dorkhas ba ka seng ka la dep buh myn ha ka 12 tarik mynta u bnai nailur ha kaba ka seng ka la pan jingpynshai halor ka jingkhlong ïa ka surok ha Lad Tongseng elaka Nongkhlieh bad u heh jong ka tnat, mynta ka angi u la iathuh sha ki dkhot ka seng ba naka liang ka tnat ka la dep ujor da ka ejahar ha tnat pulit ban lap ïa kiba donkti ha kaba khlong ia ka surok ha ka sngi ba long public hearing ka Shree Cement.
“Haba ïakren mynta ka sngi, u heh sorkar ka tnat PWD Khliehriat Division u la ong ruh ba ka tnat ka la leh la ka kamram kum ka tnat kaba peit ba khmih ïa ka surok PWD, hynrei pat ban kem ïa kiba donkti ha katei ka kam beaiñ ka tnat ka shaniah ha ki pulit” iathuh u nongialam ka KSU na East Jaiñtia Hills District.
Ka seng lyngba ka dorkhas ka la dawa na ka tnat PWD ba kan pynshai ba hato ka tnat ka la ai jingbit ne em ïa kino kino ki riew paidbah ne riew shimet ne kino kino ki kynhun ban tih ban khlong ïa katei ka surok ha Lad Tongseng bad lada ka la ai jingbit ka tnat ka dei ban pyni da ka jingthoh ba kynthup kum ka file number, ka order nuber lem bad u heh sorkar ba ai jingbit, shuh shuh ka seng lyngba ka dorkhas ka la kyrpad ruh ban pynioh ïa ka aplication namar ioh don mano mano na ki riew shimet ne na ki paidbah ne ki kynhun kiba pan jingbit na ka tnat ban khlong ïa ka surok khnang ban shai ba nangno ki ioh bor ban khlong ïa ka surok bad lada jia ba ka tnat ka khlem ai jingbit ïano ïano ruh hato balei ka tnat kam tohkit ïa kane ka kam, pynpaw ka KSU East Jaiñtia Hills, shuh shuh lyngba ka dorkhas na ka liang ka seng ka la kyntu ïa ka tnat ban ujor da ka ejahar bad ha ka jingbuddien ka seng ka la ioh jingtip ba ka tnat ka la buh ejahar kumba la dawa da ka seng.
Ka seng ka kyntu ruh ïa ka Crime Brach jong ka sorkar ka dei ban leh ïa ka kam kumba la dawa da ka seng ba lada kam leh ka seng kan sa peit bad shim ïa kawei pat ka synjam.