Na kad Liengsuiñ Guwahati leit synran ki nongïalam KSU ïa ki samla pule ba wan phai na Manipur
Nongpoh, Jymmang 06 : Ki nongïalam bad ki dkhot ka KSU Sengkmie bad na Ri Bhoi ha ka janmiet jong ka Sngi Thohdieng ki la leit ban pdiang bad ban synran ïa ki samla pule ka jylla kiba wan phai na Manipur hadien ba ki la wan poi ha Kad Lingsuiñ Guwahati.
Kum ban pynkynmaw, kane ka jingwan phai noh ki samla pule ka jylla na Manipur, ka dei hadien ba ladon ka jingïaumsnam bad ki jingïakhih kaba jur kaba la jia ha ka jylla Manipur, kaba dei na ka jingïakynad kaba jur hapdeng ki Jaid Bynriew Meitei bad ki Kukis haduh ba ka la ktah ïa ka shongsuk shongsaiñ bad ka sorkar ka la hap ban pynkhlaiñ ïa ki bor pahara ba la poi shaduh u pud jong ka jingïap bad ka jingïaumsnam.
Ki nongïalam ka KSU ki la shim khia ban leit synran bad pynshngaiñ ïa ki samla pule kiba pule ha CAU Manipur kumba 66 ngut, ka dei hadien ba ki la wan phai noh sha la ka jylla, na ka daw ka jingbym shngaiñ shuh ban shong ban sah ha Manipur kaba dei na ka jingïakynad kaba jur hapdeng ki jaid bynriew Meitei bad ki Kukis.
Ha ka jingïalam u Samla Vincent Makri bad kiwei ki nongïalam ka KSU, ki la leit ban ai mynsiem ïa ki samla pule hadien ba ki la wan poi ha ka Kad Liengsuiñ ha Guwahati da kaba synran ruh ban wan phai sha ka jylla Meghalaya kum kawei na ka seng kaba ju shakri bad peit ïa ka bha ka miat jong ki samla pule ka jylla.
Haba kren ha kane ka sngi, u Samla Vincent Makri kum u nongïalam ka KSU, u la ai khublei kyrpang ïa ka sorkar jylla kaba la shim khia ban synran ïa kine ki samla pule ba wan phai noh sha ka jylla bad ruh ba ka sorkar jylla ka la shim khia ban ai ka jingïada ïa ki samla pule ka jylla kiba pule sha ka jylla Manipur.
Ha kane ka jingleit pdiang ka KSU ïa ki samla pule ban synran na ka bynta ban wan phai sha la ïing la sem la don ryngkat ruh u Bah Daniel Thangkhiew kum u Officer on Special Duty bad uba la pyntip ruh ba kine ki samla ki dei ki kynhun samla pule ba nyngkong kiba sahkut ha jylla Manipur ba ki la ioh ban wan phai suk phai sain sha la ïing la sem bad na ka liang ka sorkar ka la pynbeit ruh sa ar tylli ki Liengsuiñ ban kit ïa ki samla pule ba dang sahkut ha Manipur bad lada kine ki ar tylli ki Liengsuin kin ioh ban leit kit biang ïa ki sala pule baroh ki samla pule ba sahkut ha Manipur kin ioh noh ban wan phai sha ka jylla katba dang don katei ka jingïakynad kaba jur ha ka jylla Manipur.