Nongpoh, Jymmang 06 : Ka Khasi Student Union kala dawa syndon naka sorkar ba dei ban sospon syndon ïaki doctor ba donkti ban sumar torti bad pynsahkut thyrñia haka met jong kawei ka longkmie kaba leit ban kha khyllung ha Ganesh Das Hospital Shillong, haduh ba I khyllung ba katei ka longkmie ka kha I la khlad noh syndon na kane ka sla pyrthei.
Haba phah ïaka kyrwoh naka liang u Samla Banshemphang Kharnaior President ka KSU Umiam Circle u la pynpaw ba kum ka seng kala dap da ka jingsngewkhia bad sngewsih halor katei ka jingjia kaba la pynpar ñiangkhriat ruh ïa kiba bun ba lang hadien ba uwei u thyrñia u la sahkut haka met jong ka kong Phaltima Rani naka shnong Mawlyndep, Ri-Bhoi kaba la leit ban kha khyllung ha Ganesh Das Hospital naka jingsumar torti bad thurmur da katei ka jaka sumar sorkar.
U la ong ruh ba kane ka jingleh thurmur jong ki nongtrei ka Hospital ka buh jingma ïa ka jingim jong ki briew bad wanrah ruh ïa ka jingshong syier ïa ki paidbah ba phah sumar ha katei ka Hospital kumba katei ka jingjia kam dei shuh ka sien ba nyngkong hynrei ki jingleh torti da katei ka hospital ki ju jia naka por shaka por.
Halor katei ka jingleh thurmur bad ban nym buh ïaki paidbah ba leit sumar hapdeng ka jingsyier, naka liang ka seng kala dawa syndon naka sorkar ba dei ban sospon syndon ïaki doctor ba donkti ha katei ka kam wat ban knieh noh ïaka license jong ki, namar kum ki nongsumar bala dep pyntbit kim dei ban lehkai bad ka met jong ki briew hynrei ban sumar janai haka rukom kaba dei. Shuh shuh naka liang ka seng ka dawa ruh naka sorkar ba ka dei ban pynlong ka jingtohkit kaba bñiah halor katei ka jingjia bad dawa ruh ban siew bai lutksan sha katei ka longkmie.
