Shillong, Jymmang 06 : Sa 165 ngut ki samla pule kiba dang sahkut sha Manipur bad ïa kine yn pynpoi sha ka jylla ha kine ki saw sngi ban wan kata haduh ka 10 tarik u Jymmang.
ïa kane la pyntip da ka Ophis u Myntri Rangbah ka Jylla (Chief Minister’s Office) haba ïathuh ba ïa kine ki samla pule ki ban sa nang wan, yn wan ïalam da ka liengsuiñ bala pynkhreh da ka Ophis u Myntri Rangbah ka Jylla u Conrad K Sangma bad da ka jingïatreilang bad ki shipai India , ïa kine ki samla pule yn synran da ki shipai naduh ka jaka ba ki sah haduh ha Imphal Airport.
Ka Ophis u CM ka pyntip ba hynne ka sngi, 17 ngut ki samla pule ki la wan poi ha Guwahati Airport bad la pdiang ia ki da ki Ophisar ka Jylla kiba la pynbiang ruh ïa ki jingbam hashuwa ba kin kiew ha ki bos ba la pynkhreh da ka Jylla ban ïalam ïa ki sha Shillong bad sha Ri-lum Garo.
Ka pyntip ba ha kine ki saw sngi ban wan kata naduh ka 7 tarik haduh ka 10 tarik Jymmang, kin don sa 165 ngut ki samla pule bad nong Meghalaya ki ban sa leit shaw na Imphal. Kine ki long 50 ngut ki samla pule/nong Meghalaya ki ban wanphai ha ka 7 tarik, 70 ngut ha ka 8 tarik, 30 ngut ha ka 9 tarik bad 15 ngut ha ka 10 tarik.
La pyntip ba ka Sorkar kala phah ïa arngut ki Ophisar ka Jylla ban leit bad sah ha Imphal na ka bynta ban khmih ïa ka jing wan ïalam noh ïa ki samla pule/nongshong shnong ka Jylla bad ban pynbeit ïa ka jingkyrshan jong ki bor sorkar ka Manipur na ka bynta ka jingïaid lynti kaba shngaiñ jong kine ki samla pule.
Lah ban kdew ba hynnin ka sngi Thohdieng, haduh 66 ngut ki samla pule bad nong Meghalaya kila wan phai shala ïing na Manipur da ka jingiarap ka Sorkar Jylla. Kine kila wan da ka Alliance Air bala pynkhreh da ka Sorkar Jylla halor ka jingbthah jong u Myntri Rangbah ka Jylla.
Namar ka jinglong jingman ka bym pat thikna ha Jylla Manipur namar ka jingïakynad pher jaidbynriew hapdeng ki paid riewlum ka Jylla bad ki jaidbynriew Meitei, u Myntri Rangbah ka Jylla ula lum biang ïa ka jingïalang shong bishar kam hynne ka sngi ban ïoh jingtip ïa kaei kaba long ba man halor ka jingwan phai ki samla pule.
Ka Sorkar Jylla kala ïakren khlem sangeh bad ki samla pule ha Manipur ban peit thuh ïa ka jinglong jingman ha katei ka jaka bad ban ai jingïarap ïa ki kat kaba don ba kin lah ban wanphai suk sha Jylla.
U Myntri Rangbah ka Jylla Conrad K Sangma hynne ka sngi Saitjain, ula pyntip ba jan kot 100 ngut ki samla pule lah dep ban pynmih na Manipur bad la wan ïalam suk shapoh ka Jylla.
Ula ong ba sa 40-50 ngut ki samla pule kila don ha lynti. Ula kular ruh ba ka Sorkar kan sa wan ïalam noh ïa baroh ki samla ba dang sahkut ha Manipur hapoh ka 48-72 kynta.
“Jan kot 100 ngut kila wan poi sha Jylla bad katba ngi dang ïakren sa kumba 40-50 ngut kin wan poi mynta ka sngi. Phi hap ban pyrkhat ba ha Manipur, ki jaidbynriew na Meghalaya ki dei kiba don bun eh. Ngi don bun bah ki samla pule kham bun haba ïanujor bad kiwei pat ki Jylla ka thaiñ Shatei Lam Mihngi. Na kata ka daw ka jingpynïaid ïa ki kam ki jam ka kham shimpor” ula ong haba ïakren bad ki nongthoh khubor shabar ka jingïalang wan rung pura jong ka PDF sha ka NPP.
U Conrad ula ong ba ka Sorkar kala lah ban buh kyrpang ïa ki jaka shong ïa jan baroh ki nongshong shnong ba sahkut ha Manipur. Hynrei, kumba 5-10 tylli ki seat ym shym la lah ban pynthikna hynrei u kular ban sa pynthikna noh ha kine ki 48-72 kynta ban wan.
“Ngin shimkhia ba ha kine ki 48-72 kynta ngi dei ban lah ha kaban wan ïalam noh ïa baroh ki samla pule jong ngi” ula pynthikna.
Ka Sorkar Meghalaya ka la sdang ia ka jingpynmih ïala ki jong ki Nongshong shnong khamtam ki samla pule, na Manipur naduh ka sngi Thohdieng.
Ka Sorkar Jylla kala pynkhreh ïa ka liengsuiñ ba kyrpang bad ki bos ban wan ïalam noh ïala ki jong ki nongshongshnong na Manipur.
