Pyntbit ka Elite Task Security and Service Emergency 33 ngut ki samla kum ki Security
Shillong, Jymmang, 06: Ka Elite Task Security and Service Emergency kaba don ha ka shnong Mawjrong, East Khasi Hills Distirct ka la sei haduh 33 ngut ki samla shynrang bad kynthei kiba la shah hikai pyntbit ha ka kam Security lane ka kam ap pahara.
Ha kane ka sngi, la sakhi lang da u SI jong ka Home Guard u Bah Shivam Nongrum uba lalong kum u kum u kongsan, u Fr. Gedwin Warbah kum u symbud kongsan, u Bah Headingson Ryntathiang, u Bah Pynshai Mawrie, u Bah John Kharjahrin uba dei u Adviser, ka Kong R. Suting kaba dei ka Director
Ha kaba ïadei bad kane ka jingai jinghikai, ki samla ki ïoh ïa ki jinghikai lyngba ka jingsnohkti jong ka Elite Task Security bad kiwei pat ki center kiba kynthup ïa ka International Red Cross Society, Meghalaya Branch bad ka Civil Defence and Homeguard bad lyngba ka jingai jinghikai kaba 45 sngi. Kine ki samla ki la ïoh ïa ki syrnot na baroh lai tylli ki Center bad la ai ruh ki jinghikai ha ka English, Leadership Management, Personal Development, ka jinghikai ïa ki Skills Development bad kiwei kiwei.
Haba phai sha kane ka Passing Out Parade jong ka First Batch, la pynher ïa ka lama lairong jong ka Ri da u kongsan, bad la pynbud sa ka march pass bad ka jingpynsmai da ka Kong R. Suting bad hadien kane la pynlong sa ka Drill bad ki jingsam ïa ki khusnam sha ki 33 ngut kiba la pyndep ïa ka jinghikai bad kumjuh sha kiba ïoh ïa ki khusnam shimet.
U Bah Shivam Nongrum haba kren kum u Kongsan u la ai mynsiem ïa ki samla kiba ki la wan shakhmat, jngai na la ka iing ka sem ban pynlut por 45 sngi ha ka jingai jinghikai bad khlem kano kano ka jinglehraiñ, ki la wan da lade.
U la ong ba ha kane ka por ba kyrduh kam kyrduh jam, ka ladei ka por ba ki samla kin wan ha kum kine ki jingai jinghikai, ban ieng ha la ki jong ki kjat namar kano kano ka kam ka wanrah ïa ka jingsarong ïa ka iing ka sem.
U la bthah ïa ki khynnah kiba la pyndep ïa ka training ba kin bteng biang ïa ki jingshah hikai namar ha ki kyrdan kiba heh, kin dang shah hikai shuh shuh bad mynta ki kynti kan hap ha ka jinghikai jong u.