Ki shong ha baranda, ki leh thik kumba synshar ma ki ha Secretariat: Khyrwit biang u Bah Prestone

Shillong, Jymmang 06 : U National Vice President ka NPP, Bah Prestone Tynsong ba dei ruh u Symbud Myntri Rangbah ka jylla ha ka sngi Saitjain u la ong ba u shutia haduh katta haba u peit ïa ka jingkynthoh jong kiwei pat ha ki youtube.
“Ka jingitynnad namar ka ishutia namar ki kren ki briew ki bym tip ïa ka bneng ka khyndew, nga shu samrkhie. Ki leh thik kumba synshar ma ki ha Secretariat ki leh thik kumba shong ha jaka ba shong u Myntri Rangbah bad Symbud Myntri Rangbah tip pynban mrong mrong ha baranda ki shong.” u la ong haba kren ha ka jingïalang ïalap elekshon jong ka NPP Area Diengiei kaba long ha Mawlaiteng.
Nalorkata, u ong ruh haba ki wan sha Sohiong ki batai stad kumba ki tip lut ïa kawei pat kawei ka lain jong ka file. “Nga mut ban ong ïa ki nongïalam na kato ka party sngewbha pynduna ka ktien namar ka ibiej palat,” u la bynrap shuh shuh.
Shwa kane, u Bah Prestone u ong ruh ba ha ka jingwan ïalap elekshon jong ki sha Sohiong ka long ban pynshai ïa ki polisi bad ki kam kiba kum ka sorkar ka thmu ban leh na bynta ki paidbah ym ban ïa kdew kti ïa iwei pat.
U ong ruh ba ynda la dep ka surok ban pynïasoh ïa ka Lawmei bad ka Umlyngka kaba la mang 98 klur kan kyntiew stet ïa ka ïoh ka kot jong ka thain khamtam na ka bynta ki samla ban seng ïa ki kam lajong ban khring ïa ki kam jngohkai pyrthei.
“Ki khun samla ba la nang la stad, wat pyrkhat tang ïa kam sorkar hynrei sdang ïa ka kam lajong. Lada phim nang ong ïa u Bah Samlin ban wan ïalang shanga ngan batai. Shna ïa ki homestay kiba 10lak tyngka, 7lak tyngka yn ïarap ka sorkar bad 3lak phi lah ban shim da ka ram. Don mo kiwei kiwei ki party ba nud wan kular kumta,” bynrap biang u Bah Prestone.
Na ka liang u Bah Samlin pat u la pynsngew ha u Symbud Myntri Rangbah ba katei ka thain kadei kaba baroh ki dei ki nongrep hynrei bun kim ju leit ban pan jingïarap na ka sorkar namar ka shim por bad ka bunkam palat. Kumta u la kyrpad ban wad lad lem na bynta jong ki.
Shuh shuh u ong ruh ba kum u nongmihkhmat ha ki san snem um pat ju thok ne leh bakla hynrei kaei kaba u trei kadei beit na ka bynta ka jingmyntoi ki paidbah.
U la ïathuh ruh ba mynta ki la bun bha na kiwei pat ki party kiba la wan ban tyrwa ban treilang noh bad ka NPP na ka bynta kane elekshon.
“Ngi don ka jingkyrmen ba ngin tam bun namar katba ki nang kren bein bad nang kynthoh katta ka kham bun ka vote ngin ïoh,” u la bynrap biang.
Ha kane ka sngi la ïoh ruh ïa ka jingkren na kiwei pat ki nongïalam ka party kynthup naduh u MLA ka Jowai, Bah Wailad Shylla bad kiwei kiwei.