Na ka Scrutiny ki kyrtong ha Ri Bhoi, sahkut ki Ambulance bad ki kali paidbah bun kynta ha ka surokbah NH-6 ha Nongpoh
Nongpoh, Rymphang 08: Na ka jingdon ka Scrutiny ban bishar bniah ïa ki jingthep kyteng ki kyrtong na ki 5 tylli ki Constituency ha Ri Bhoi kaba long mynta ka sngi ha ka ophis treikam u Deputy Commissioner ka Ri Bhoi, kiba bun ki paidbah nongleit nongwan ki la sahkut ha ka surokbah, kaba dei na ka daw ka jingdheng kali kaba la pynkhapngiah ïa ka surokbah na ka jingwan synran lang ki paid nongkyrshan ki kyrtong na ki Constituency bapher bapher ha Ri Bhoi.
Ka jingdheng kali ha kane ka surokbah ba hap ha ka thaiñ Nongpoh ka la sdang naduh ka por 10 baje mynstep ter ter naduh na Umsning shaduh ki thaiñ Byrnihat bad ka daw ka long ba bun ki paid nongkyrshan jong ki kyrtong ban aireng ha kane ka election ki la wan ban synran lang ïa la u kyrtong ha ka Scrutiny, kaba dei ka sngi ba ka election commission of India ka bishar bniah ïa ki kot ki sla (Scrutiny) ïa ki kot ki sla jong ki kyrtong ba la dep ban thep kyrteng na ki 5 tylli ki Constituency ha Ri Bhoi District. Kumba la ioh lum jingtip mynta ka sngi la don ki Ambulance bad ki Kali paidbah kiba leit sha Guwhati bad don ruh kiba beh ïa sha ki kad Lingsuiñ ki la sahkut ha surokbah bad ka daw ka long ba ïa kane ka surokbah la khapngiah tang da ki Kali jong ki paid nongkyrshan ki kyrtong na ki 5 tylli ki Constituency ka Ri Bhoi District.
La sakhi ruh ha kane ka sngi, na ka liang ki bor pulit ka Ri Bhoi ruh ki la pyrshan ban weng ïa kane ka jingdheng kali ha katei ka surokbah, hyrnei namar ba la bun palat ki paid nongkyrshan kiba la wan la ki jong ki Kali, ka la shem jingeh ban weng ïa kane ka jingdheng kali kaba la ktah shisha ïa ka leit ka wan jong ki paidbah nongleit nongwan lyngba jong kane ka surokbah National Highway-6 ha Ri Bhoi District.Shuh shuh, lyngba jong kane ka sngi ba don kane ka Scrutiny ban bishar bniah ïa ki kot ki sla jong ki kyrtong shuwa ba kin long kita ki kyrtong ba pura na ka party ba kin aireng, ka lyer jong kane ka election 2023 ka la beh bha ha Ri Bhoi, ha kaba ki nongkyrshan jong ki kyrtong bapher bapher ki la wan ban synran ïa la ki kyrtong da kaba rah ïa ki lama bad kumjuh ruh ki jingtem ban pynshongshit ha kane ka sngi shuwa ban bishar ïa ki kyrteng jong ki kyrtong kiba la dep ban wan thep kyrteng ban aireng na ki 5 tylli ki Constituency ba ki kyrtong kiba la biang pura ki don haduh 35 ngut hadien ka ba pyndep ïa ka Scrutiny.