Shillong, Rymphang, 08: Ka BJP Meghalaya State Unit ha ka sngi Baar ka la kynthoh ïa ka National Peoples Party (NPP) ba ka jinglehmeng kan sa pynjot hi ïa ka ha kane ka elekshon ban sa long sha Iingdorbar Thawaiñ ka Jylla.
Haba kynthah ïa u Conrad Sangma uba long u National President jong ka NPP, ka BJP ka la ai jingmut ba un pyrshang ban ïada ïa la ka jong ka Seat ha ka jaka ban kheiñ troiñ ïa ka resol jong ka BJP.
Da kaba kynnoh ïa ka NPP ka kham pawkhmat hapdeng ki paidbah ka Meghalaya ha ka jyrsieh bamsap, ka BJP ka la ong, “ha ka jaka ban shna ïa ki surok kiba pynïasoh sha ki shnong ki thaw, ki nongïalam jong ka NPP ki la pyrshang ban tei ïa ki lynti sha iing lajong. Ha ka jaka ban pynshai ïa ki surok, ki nongïalam ka NPP ki la pynshai pynthaba pynban ïa la ka jong ka ing ka sem. Ha jaka ban tei ïa ka jylla, ki la lum spah pynban ïalade.
Ka BJP ka la ong ba ki paidbah ki shu peitkai bad ki paidbah kin sa ai jubab kumba dei hok ha kane ka elekshon ka ban sa long shen.
“Ka dei ka jingong jong u Conrad Sangma ba ki paidbah kim dei ban pynlehnoh ei ïa ka vote jong ki. Ka lyer ka la beh. Ki paidbah ki la rai ban jied ïa ka BJP ba kan bat ïa u lakam synshar bad ban pyntreikam ïa ki kular bad ki paidbah ki ladep rai ba kin ym jied ïa ki nongïalam ki ban wan phai tang ha ki san snem da ka buit thymmai ban shukor biang ïa ki paidbah,” la bynrap ka BJP.
