Mano pat ban jop hadien ka 27 tarik u Rymphang na ki 5 constituency ka Ri Bhoi ??

Nongpoh, Rymphang 08: Ki kyrtong kiba la thep kyrteng ba la kot haduh 35 ngut na ki 5 tylli ki Constituency ha Ri Bhoi mynta ka sngi ha ka jingbishar bniah ïa ki kot ki sla (Scrutiny) da ki returning officer ki la biang bad ki la ioh lad ruh ban long kita ki kyrtong ban ai reng ha kane ka elekshon 2023 bad mano pat u kyrrong ba wan ha ka kyrdan kaba nyngkong eh ban long u nongmihkhmat ka sah sa tang ha ka rai jong ki paidbah na ki 5 tylli ki Constituency ha Ri Bhoi.
Kum ban pynkynmaw, ki don haduh 35 ngut ki kyrtong kiba la pyndep ban thep kyrteng na ki san tylli ki Constituency kiba don ha Ri Bhoi District bad mynta ka sngi la lah ban bishar bniah ïa ki kot ki sla jong ki ha ka Scrutiny bad baroh ki la ïoh ban long kum kita ki kyrtong ba pura ban ïa aireng ha kane ka elekshon 2023 hapoh ka jylla. Lyngba kane ka Scrutiny kaba la long mynta ka sngi, la sakhi ruh kiba bun hi ki kyrtong ki la pynpaw ïa kata ka jingsngewkhem ba jop na ki Constituency ba ki mih ban aireng bad ïa kane la sakhi haba la ïoh ruh ban ïa kren bad ki katto katne ki kyrtong na Ri Bhoi kiba la pynpaw ïa ka jingsngew skhem ban jop wat la ka sngi ban jied ïa ki nongmihkhmat kam pat poi bad ki la shu kam ba ki don beit kata ka jingsngew-skhem ban jop khlem pat da ai rai ki paidbah na ki Constituency.
La sakhi ruh ha kane ka sngi, ha kaba wat la ka dei ka sngi kaba dang dei tang ka Scrutiny ban bishar bniah ïa ki kot ki sla jong ki kyrtong la ki la long ne em kiba bit ban long kita ki kyrtong ba pura katkum ka jingthep kyteng jong ki bad kaei kaba la ïohi ba ki paidbah nongkyrshan jong ki kyrtong bapher bapher ki la ïa wan ban synran ban ai mynsiem ïa la ki kyrtong haduh ka ophis u jong u Deputy commissioner ka Ri Bhoi ha Nongpoh.
Na ka liang ki paidbah nongkyrshan jong ki kyrtong bapher bapher ki la rah la ki lama bad kumjuh ruh ban ïa pyrta ha la ka jong ka symbol jong u kyrtong uba ki mihkhmat ban ïa khun ha kane ka election 2023 na ki 5 tylli ki constituency ha Ri Bhoi District.
Kine ki kyrtong kiba la biang lut bad kiba la ïoh ban long kum kita ki kyrtong ba pura na kitei ki 5 tylli ki constituency ba ki thmu ban ai reng ki kynthup na ka 08-Mawhati Constituency, u Bah Charles Marngar, Congress, u Bah Baïahunlang Makdoh, na ka UDP u Bah Shemphang Lyngdoh na ka NPP, u Dr. Evarist Myrsing na ka BJP, u Kong Evalin Kharbani na ka HSPDP, ka Dr. Saralin Dorphang na ka TMC, u Bah Raswell Shadap na ka PDF bad u Bah Osbert Banteilang Rynjah kum u kyrtong shimet.
Ki kyrtong kiba ïakhun na ka 09- Nongpoh Constituency ki kynthup ïa u Bah Mayral born Syiem, na ka UDP, ka Kong Macdalyne Sawkmie Mawlong na ka NPP, ka Kong Rona Khymdeit na ka party Congress, ka Kong Marian Maring na ka BJP, u Bah Longsingh Bey na ka TMC bad u Bah Bismo Ingty kum u kyrtong shimet.
Na ka 10-Jirang Constiteuncy ki kyrtong ki kynthup ïa u Bah Sosthenes Sohtun na ka NPP, u Bah Bathok Nongmalieh na ka UDP, u Bah Adrian Chyne na ka Congress, ka Riya Sangma na ka BJP, u Sunmoon D.Marak na ka TMC. Ka Serimina D. Marak na ka RPI, u Forcaster Nongrang bad u Bah Lee Bareh kum ki kyrtong shimet.
Na ka 11- Umsning Constituency ki kyrtong ki kynthup ïa u Bah Jason Sawkmie Mawlong na ka NPP, u Bah.Sunshine Makri na ka UDP, u Dr. Celestine Lyngdoh na ka Congress, u Bah Donlang Sohkhlet na ka PDF, u Bah Ricky J.Syngkon na ka VPP, u Bah Gilbert Nongrum na ka TMC, u Bah Duruth Majawna ka BJP bad u Bah Primose Makdoh na ka HSPDP.
Ki kyrtong pat kiba ïakhun na ka 12-Umroi Constiteuncy ki kynthup ïa u Bah George Lyngdoh na ka TMC, u Bah Damanbait Lamare na ka NPP, u Bah Stanliwis Rymbai na ka Congress, u Bah Baïateilang Lapang na ka PDF bad u Bah Shanbor Ramde na ka BJP.