Rai ki kyrtong na West Jaiñtia Hills ban ïakhun beit ha madan ym ha jrong miej

0

Jowai, Rymphang 08: Mynta ka sngi 8 tarik u Rymphang kaba dei ka sngi ban bishar bniah ïa ki kot ki sla (Scrutiny) jong ki kyrtong ban ïakhun ïa ka Election MLA 2023 napoh ka West Jaiñtia Hills jong ki 5 tylli ki Constituency ba kynthup ïa ka 1-Nartiang, 2-Jowai, 3-Raliang, 4-Mowkaiaw bad ka 7-Amlarem Constituency.
Ha kane ka sngi la lap baroh ki kot ki sla ki long kiba biang ryngtih katkum bala pynshisha da ki Returning Officer, katba na ka liang ki kyrtong kiba la rai ban nym bishar bniah shuh ïa ki kot ki sla kawei hadien kawei hynrei ki la monjur ban ïakhun beit ha madan ym ha jrong miej.
Katba na ka liang ki nongkyrshan ïala ki jong ki kyrtong kila leit synran lang ïala ki jong ki kyrtong shaduh DC Ophis Jowai bad ynda ki kyrtong kila mih noh, ki nongkyrshan ha ryngkat ki jingrwai jingrisa ryngkat ka jingkaweh lama kila leit shaw bad leit on ïala ki jong ki jong ki kyrtong.
Ki kyrtong kiba la rai ban ïakhun na ka 1-Nartiang Constituency ki long u ma Sniawbhalang Dhar (NPP), ma Dawan Lyngdoh (UDP), ma Emlang Laloo (INC), ma Rimiki Sari (BJP) bad u ma Generous Pasleiñ (IND).
Na ka 2- Jowai Constituency ki long u ma Wailadmiki Shylla (NPP), ma Awhai Andrew Shullai (AITC), ma Moonlight Pariat (UDP), ma Daniel Dan (INC) bad u ma Allan Keith Suchiang (BJP).
Na ka 3-Raliang Constituency ki long ma Coming-one Ymbon (NPP), ma Lakhon Biam (BJP), ma Robinus Syngkon (AITC), ma J. Treilang Suchiang (UDP), ma Chemhok Garod (PDF) bad ma Richard Sing Lyngdoh (INC).
Na ka 4- Mowkaiaw Constituency ki long ma Nujorki Sungoh (UDP), ma Lasting Suchiang (AITC), ma Nehemayah Tyngkan (INC), ma Habahun Dkhar (NPP) bad ma Corentis Rabon (BJP).
Katba na ka liang ka 7-Amlarem Constituency ki long ma Lahkmen Rymbui (UDP), ma Stephanson Mukhim (NPP), ma Arbiang Kam Kharsohmat (INC), ma Aiban Gashnga (AITC) bad u ma Firstborn Manner (BJP).
Kine ki kyrtong naduh mynta a sngi kin sa sdang noh ïa ka jingïalap election sha manla ki shnong jong ki katkum ki kyndon aiñ jong ka Election Commission, da kaba kim bit ban ïaid lait ïa ki jingbthah jong ka Model Code of Conduct.

Leave A Reply

Your email address will not be published.