Na ka jingkular pynïohkam, hap siew ei u rangbah ïa ka ram ba shah thok ha ki longkmie

Shillong, Risaw 30: Uwei u nongshong shnong kawei ka shnong ha nongbah Shillong u la ujor ba kawei ka briew kaba kyrteng ka Kong Saphiwanbet Kharkongor, ka la shim ïa ki kot ki sla shimet jong u ba kynthup ruh ïa ka jingtip ba bniah ïa ka bank account bad ka passbook jong u, da kaba kular ban pynïoh kam ïa u. Shuh shuh utei uba ujor u la ïathuh ba ha ka 13 tarik u bnai Jymmang, ha ryngkat bad ka Kong Saphiwanbet Kharkongor ki la ïakynduh pat ïa kawei ka longkmie kaba kyrteng ka Roshni Chettri ha Frank Yamaha, Mawlai, Shillong, ha kaba ka la don ka jingïakren pynbeit hapdeng jong ki; bad hadien kane, baroh 3 ngut ki la leit ha Indian Bank, Bara Bazar (Ïewduh) Branch, ha kaba ka Kong Saphiwanbet Kharkongor ka la plie ïa ka Bank account ha ka kyrteng jong u, ha kaba ka la ong ba ka long kaba donkam na ka bynta ka kam jong u.
Kham hadien pat utei uba ujor u la sngewthuh ba kitei ki longkmie ba la shah kynnoh ki la shim ka ram kumba T. 1,45,148/- ha ka kyrteng jong u ban thied ïa ka thuk thuk. Halor kane ka jingjia, utei u rangbah uba la ujor u la ïathuh shuh shuh ba ha u bnai Naitung, u la shah phone ha ki briew kiba la pynithuh ba ki dei na ka kynhun debt recovery (team) jong ka Bank, ha kaba ki la dawa na u ba u dei ban siew noh ïa ka ram.