Jowai, Risaw, 30: Ka Jaiñtia Revolutionary Council (JRC) Central Body mynta ka sngi hapoh ka jingïalam u President Leaferdinand Suiam ha ka jingdon ryngkat u Vice President ma Artist Sari, u General Secretary ma Heipor Saioo bad u Working President ma Thmu Hadem, ki leit ban ïa kynduh ïa u Deputy Commissioner ka West Jaiñtia Hill halor ka nongrim ba ka ophis ka la pynslem ban ai ïa u LGD Code (Local Government Directory) ïa ka shnong Mowluber.
Hynrei namar ba u DC um don mynta ka sngi na ka liang ka seng ka la ïoh ban ïa kynduh ïa ka kong V. Kezo (IAS) SDO (Sadar), West Jaiñtia Hills. Ha kane ka jingkynduh na ka liang ka seng ka la pynsngew ïa ka ophis halor kaei ka nongrim ba pynslem ban ai ïa u LGD Code jong ka shnong Mowluber bad tang namar ka jingpynslem ban ai ïa u LGD Code ïa kane ka shnong baroh ki jingmyntoi ba ka shnong ka dei ban ïoh kam ïoh shuh.
Kat kum ka jingthoh ba ka seng ka la ïoh na u Mission Director ka Rural Employment Society bad Mission Director Community and Rural Development Meghalaya ba la phah sha u DC West Jaiñtia halor ka nongrim ban ai ïa u LGD Code jong ka shnong bala phah naduh u snem 2024 khnang ban lah ban pyntrei kam ïa ki Scheme sorkar khamtam ka Job Card, hynrei haduh mynta na ka liang ka ophis u DC kam pat ai ïa u LGD Code sha ka shnong.
Naka liang ka SDO (Sadar) ka la kular ban ïakren ïa u DC bad ïa ka ophisar ba dei peit ïa ka tnad C&RD ba balei ba pynslem ban ai ïa u LGD Code sha kane ka shnong bad shen kan sa ai jingtip sha ka seng.
Ka seng ka kyntu ïa ka ophis ba kan pynkloi noh ban ai ïa u LGD Code sha ka shnong khnang ba ki nongshong shnong kin ïoh ïa ki jingmyntoi kumba dei ban ïoh.
