New Delhi, Risaw 30: Ka ri kan rakhe ïa ka Rashtriya Ekta Diwas (National Unity Day) ha ka 31 tarik u Risaw 2025 ban kynmaw burom ïa ka lyngkhuh sngi kha ba 150 snem jong u Sardar Vallabhbhai Patel, u Symbud Myntri Rangbahduh ba nyngkong jong ka ri India bad u Myntri kam Pohïing ka Ri India. U la don ka bynta kaba kongsan ha kaba pynïasoh lang palat 560 tylli ki hima sha ka ri India. Kane ka sngi ka dei ka sngi kaba rakhe ban kynmaw bad rakhe ïa ka jingnoh synniang kaba khraw jong u Sardar Patel na ka bynta ka jingïatylli jong ka ri, ka burom bad ka bor synshar dalade ban pynskhem biang ïa ka khubor ba neh jong ka “Ek Bharat, Shreshtha Bharat”.
U Myntri Rangbahduh ka ri u Narendra Modi un ïalam ïa ki jingrakhe jong ka ri ha Ekta Nagar (Kevadia), Gujarat. U Myntri Rangbahduh un buh syntiew ha u Statue of Unity bad bud sa ka jingïaid parade bad ka prokram ba ïadei bad ka kolshor. Ka bynta jong ka Rashtriya Ekta Diwas ha u 2025 ka shim ïa ka jingmut kaba kyrpang namar ka dei ka jingrakhe ïa ka lyngkhuh sngi kha ba 150 snem jong u Sardar Patel. Yn rakhe ïa ka lyngba ki prokram kiba neh baroh shisnem ha kylleng ka ri kiba pynpaw ïa ka jingim bad ka pateng jong u.
Ka jingïalang ba kongsan ha Ekta Nagar kaba pyni ïa ka jingïatylli hapdeng ka jingïar
Ka jingrakhe ba kongsan ha Ekta Nagar kan kynthup ïa ka jingïaid parade kaba pyni ïa ka jingïatylli bad ka jingkhlaiñ jong ka ri. Ha kane ka parade yn don khat hynriew tylli ki kynhun kiba ïaid march past na khyndai tylli ki Jylla bad kawei ka Union Territory Police ryngkat bad saw tylli ki kynhun Central Armed Police Force (CAPF) bad ki dkhot jong ka National Cadet Corps (NCC). Kawei ka ophisar kynthei kan ïalam ïa ka jingpdiang burom ïa u Myntri Rangbahduh kaba pyni ïa ka jinglong nongïalam kaba nangkiew jong ki kynthei ha ka jingshakri ïa ka ri.
Ka bynta kaba kyrpang mynta u snem kan long ka jingïashim bynta jong ki jaitksew jong ka ri-ki ksew Rampur bad ki ksew Mudhol na ka Border Security Force (BSF). Kine ki jait ksew kin pyni ïa ka jingtbit jong ki ha ka por ki jingkhynra, da kaba pyni pyrthei ïa ka jingngeit jong ka Aatmanirbhar Bharat. Hadien ka parade yn bud sa ka air show jong ka kynhun Surya Kiran jong ka Indian Air Force.
Ka prokram kolshor kaba iphuh iphieng kan wanrah lang haduh 900 ngut ki nongshad bad nongrwai na kylleng ka ri India, ki ban pyni ïa ki rukom shad classical, jingshad tynrai bad jingshad ba mynta, bad ki jingrwai. Ha kane ka jingïalang yn pyni ruh ïa ki kali ba la saiñdur itynnad na ki Jylla bapher bapher bad ki Union Territory baroh kiba la pynshong nongrim ha ka phang pdeng “Vividhta Mein Ekta” (Ka Jingïatylli hapdeng ka jingïar). Ha kane ka jingrakhe kaba la neh shi taïew, la don katto katne ki projek pynroi kiba shongdor kumba T. 280 klur ki ban sa plie paidbah lane kiba la buh maw nongrim ha Ekta Nagar.
Ka pateng jong u Iron Man jong ka India
Ïa ka Rashtriya Ekta Diwas la ju rakhe man la u snem ban pynkynmaw ïa ka jinglong nongïalam ba radbah jong u Sardar Patel ha kaba pynïasoh ïa ka India hadien ba la ïoh ïa ka jinglaitluid. Kum u nongtei ïa ka jingïatylli jong ka ri, u Sardar Patel u la pynïasoh lang ïa ki hima sha kawei ka ri lyngba ka jingstad ha ka liang ka synshar khaddar bad ka jingkut jingmut ki bor pynïaid kam. Ki sienjam jong u ym tangba ka ïada ïa ka bor synshar dalade jong ka India hynrei ka la thaw ruh ïa ka nongrim na ka bynta ka synshar paidbah kaba ïatylli bad kaba skhem.
Ha u snem 2014, ka Sorkar India ka la buh kyrpang ïa ka 31 tarik Risaw kum ka National Unity Day ban burom ïa ka jingnoh synñiang jong u Sardar Patel ban tei ïa ka ri India kaba mynta. U Statue of Unity ha Ekta Nagar u ïeng kum ka dak jong ka jingthmu jong u bad ka jingpynkynmaw man ka por ïa ka bor kaba mih na ka jingïatylli bad ka jingïar.
Ka Ek Bharat Shreshtha Bharat: Ka jingpynneh ïa ka jingthmu jong u Patel ban ïatylli
Ha ki jingrakhe National Unity Day ha u snem 2015, u Myntri Rangbahduh ka ri u Narendra Modi u la plie paidbah ïa ka sienjam Ek Bharat Shreshtha Bharat (EBSB) ban pynkhlaiñ ïa ka jingïadei hapdeng ki nongshong shnong lyngba ki jingïasam kylliang ïa ka kolshor bad jinghikai ba la buh ryntih. Kane ka sienjam naduh kata ka por ka la nang kiew sha ka jingïakhih jong ka ri kaba pynïasoh ïa ki Jylla bad ki union Territory lyngba ka jingpule ïa ka ktien, ka jingïakynduh jong ki samla pule, bad ki jingïakren ba ïadei bad ka kolshor. Ki prokram kum ka Bhasha Sangam App, Yuva Sangam ka jingïaleit markylliang ki samla pule bad ki tamasa hapdeng ki jylla kiba ïadei bad ki rukom bam bad ka kolshor ki la wanrah ïa ka mynsiem jong ka jingïatylli ha ki skul, ki kolej bad ki shnong ki thaw ha kylleng ka ri India.
Ka rynsan digital jong ka EBSB bad ka rynsan My Bharat ki dang ïai bteng ban kyntiew ïa ka jingïatreilang jong ki samla, ka jingsngewthuh ïa ka ktien, bad ka jingsngewthuh ïa ka thaiñ lyngba ki campaign online bad ki quiz. Nalor ki pynphriang ïa ka khubor jong ka Rashtriya Ekta Diwas ha baroh shisnem da kaba pynthikna ba ka jingrakhe jong ka jingïatylli kan long ka jingpyrshang kaba ïaineh jong ka ri ym kum ka jingrakhe kaba tang shisngi.
Ka Sardar@150 Unity March: Ka jingïalam lynti ki Samla na ka bynta ka jingïatylli ha ka ri
Kum shi bynta jong ka jingrakhe ïa ka lyngkhuh sngi kha ba 150 snem ka Tnad Kam ïalehkai jong ka sorkar pdeng ka la Sardar@150Unity March lyngba ka rynsan My Bharat ban pynïasoh ïa ki samla ha ki kam kiba kyntiew ïa ka jingieit ri, ka jingkitkhlieh kum ki nongshong shnong, bad ka jingshakri ïa ka imlang sahlang. Ïa kane ka jingïaid paidbah la plie ha ka 6 tarik Risaw 2025 da u Myntri Sorkar Pdeng Dr. Mansukh Mandaviya, bad la pynlong ha ki ar bynta.
Ka bynta ba nyngkong naduh ka 31 tarik Risaw haduh 25 tarik Naiwieng ka kynthup ïa ki jingïaid kjat ha ka kyrdan distrik, ki jingïakop thoh essay bad jingïatai nia, ki seminar halor ka jingim jong u Sardar Patel, ki prokram pynkhuid bad ka bha ka miat jong ki longkmie bad ki prokram ai jinghikai halor ka koit ka khiah. Naduh ka 26 tarik u Naiwieng haduh ka 6 tarik u Nohprah ka bynta kaba ar kan kynthup ïa ka National Unity March, ka Padyatra kaba jngai 152 kilomitar naduh ka jaka ba la kha ïa u Sardar Patel, Karamsad haduh u Statue of Unity ha Kevadia. Ka jingïaid kan kynthup ïa ka jingïashim bynta na ki samla pule jong ka NSS, ki dkhot jong ka NCC, ki volunteer jong ka My Bharat bad ki samla nongïalam bad kan kynthup ïa ki exhibition kiba rakhe ïa ka jingïar jong ka kolshor jong ka India bad ka pateng jong u Sardar Patel.
Ka Run for Unity: Ka jingïatreilang na ka bynta ka jingïatylli ha ka ri
Ka Run for Unity ka dei ka bynta ba kongsan jong ka Rashtriya Ekta Diwas kaba pyni ïa ka jingkut jingmut lang jong ki nongshong shnong ban pynneh ïa ka jingïatylli jong ka ri. Ha ka 31 tarik Risaw yn pynlong ïa kane ka jingïamareh ha ki nongbah bad ki sorbah ha kylleng ka ri ha kaba yn ïashim bynta da ki samla pule, ki shipai CAPF, ki samla bad ki briew kiba don jingduna ha ki dkhot met. Ha ka nongbah jong ka ri ka prokram kan sdang na Rajghat haduh Red Fort bad yn kaweh lama da ki Myntri sorkar pdeng. U Myntri Rangbahduh u la kyntu ïa ki nongshong shnong ban ïashim bynta ha kane ka prokram bad ban pynskhem biang ïa ka jingkut jingmut jong ki na ka bynta ki jingthmu jong u Sardar Patel kum ka jingkhlaiñ, ka jingïatylli bad ka jingieid ri.
Ka Bharat Parv: Ka Jingrakhe ïa ka jingngeit jong ka jinglong kawei
Hadien ka jingrakhe ba kongsan ka Ekta Nagar kan pynlong ïa ka Bharat Parv ha ki ar taïew ba nyngkong jong u bnai Naiwieng. Ha kane ka tamasa yn don ki jingpyni ïa ka kolshor bad ki tamasa ba ïadei bad ki rukom bam na ki Jylla bapher bapher kiba pyni ïa ki riti dustur bad ki pateng ba riewspah jong ka India. Yn pynkut ïa kane ka prokram da ki prokram ba kyrpang kaba long ka Birsa Munda Jayanti ha ka 15 tarik u Naiwieng ban rakhe ïa ki jingnohsynñiang bad jingngeit kaba khlaiñ jong ki jaitbynriew riewlum jong ka ri India.
Ka Rashtriya Ekta Diwas ka pynthymmai ïa ka jingthmu jong u Sardar Patel shaphang ka jingïatylli bad ka jingshaniah halade, kaba ai mynsiem ïa ki pateng lyngba ka jingïatylli kaba ïaineh jong ka ri.
