Shillong, Risaw, 30: U Symbud Myntri Rangbah ka Jylla uba khmih ïa ka tnat PWD (Roads) Bah Prestone Tynsong u la kular ba un sa shim ïa ki lad ki lynti ban ïada ïa ka jingshah pynjaboh ka wah Umngot.
Haba jubab halor ka jingsngewkhia ka jingjaboh jong ka wah Umngot namar ka jingshna ïa ka surok Shillong-Dawki kaba dang ïaid shakhmat, u Bah Tynsong u la ong ba la bthah ïa ka kompeni ba dei peit ïa kane ka kam shna surok ban shim ïa ki lad ki lynti ban khanglad ïa ka jingpyntuid jaboh jabaiñ shapoh ka wah.
Da kaba kubur ïa ka jingeh ban khang shi syndon ïa ki jaboh jabaiñ ba pyntuid shapoh ka wah, khamtam ha ka por tih bad shna jingshna, u Symbud Myntri Rangbah u la ban jur ba la bthah shai ïa ka kompeni ban kiar na kaba pyntuid khyndew hajan ki wah kiba tuid sha wah Umngot.
“Ngi la bthah ïa ka kompeni ban khanglad ïa ka jingtuid jong ka khyndew. Ha kajuh ka por, namarba ka wah ka don um, lada hap khyndiat ki jaboh jabaiñ, kin sa tuid lang. Ka don ka jingeh ha kata. Hynrei ngi la ai ïa ki jingbthah kiba donkam ba ka kompeni ka dei ban pyrshang katba lah ban khanglad ïa ka jingpyntuid khyndew bad ban khanglad ïa ki nongpynjakhlia ïa ka wah,” u la ong u Bah Tynsong ha ka sngi Palei.
Haba kylli, u Bah Tynsong u la bynrap, “ngam lah ban ong namar baroh ki don ha ka hukum treikam bad ka jingïateh kular ba haba ki tih, ki dei ban kit ïa ka khyndew bad ki maw sha kawei pat ka jaka. Ngam ong ba haba khlong khyndew, wat tang uwei u maw ruh un ym hap – kata ka long kaba ym lah ban long. Haba phi sdang ban pynkhuid ïa ki jingtei, ngi don beit ki jingbthah. Ngi la bthah ïa ka kompeni ban kiar na kaba pyntuid khyndew hajan ki wah kiba shem lynti sha ka wah Umngot.”
Ka wah Umngot, kaba la ju long ka wah kaba khuid tam ha dewbah Asia, ka la kylla um ktieh bad jngut khlem jingim, kaba la pyntieng ïa ki nongshong shnong, ki nongpynïaid kam jngohkai pyrthei bad ïa ki seng kiba ïada ïa ka mariang.
