Na ka jingduh jingkyrmen sha ka jingkyrmen ban ïoh ka madan ïalehkai paka, jurip u MLA

Mawkyrwat, K’lyngkot 19: U MLA/MDC jong ka Ranikor Constituency Bah Pius Marweiñ hadien ka jingpynsngew na ka liang ki paidbah bad ki samla jong ka shnong Kalong ha kaba ïadei bad ka jingshna ïa ka madan ha ka sngi Saitjaiñ da lade hi u la hiar jurip ha kaba u la lap ba ka dei ka jaka kaba dap tang ki mawsiang suda.
Haba kren ha ki lad pathai khubor u Bah Pius Marweiñ ula pynpaw hadien kane ka jingshem jingeh ban trei ïa kane ka madan ïalehkai ha shnong Kalong namarba ka jaka ka dei kaba dap daki mawsiang suda hynrei watla katta kum u nongmihkhmat u kular ba un sa pyrshang biang ban trei ïa kane ka madan khnang ba ki samla jong ka shnong kin ïoh lad ban ïalehkai ha kane ka madan ha ki snem ban sa wan.
Haba ïakren bad uwei u samla rangbah jong shnong Kalong uba long ruh uwei u dkhot ka Seng Samla Shnong ula ong ba ki la don ka jingthrang shisha ban ïoh ïa ka madan ïalehkai phutbol kaba paka kumba la ïoh lem kiwei ki shnong hynrei ka long pat kaba eh namar ki sawdong sawkun jong ka shnong ki dei kiba dap tang da ki mawsiang suda.
Kumta u la pynpaw ruh ba la bunsien ki la pyrshang ban wat ki lad jingïarap hynrei kim shym la ïoh lait tang na u MLA ba mynta ka Ranikor Constituency uba la shu phah pyntrei da ka bor met.
U la ïathuh ba ki la pyrshang la bunsien ban pyntrei ïa ka madan hynrei ki shem jingeh pat ban pyndep ïa ka.
Ha kajuh ka por u la ai burom ruh ïa uwei u rangbah uba la pynïoh pisa shi lak tyngka ban pyntrei ïa kane ka madan bad kumjuh ruh ïa u MLA jong ka Ranikor Constituency Bah Pius Marweiñ uba la phah pyntrei ïa kane madan hynrei haduh mynta ym pat ïoh ïa ka madan namarba ka jaka ka daw da ki mawsiang kat shaba phai.