Shillong, Kyllalyngkot 19: Kum shibynta na ka jingpdiang sngewbha ïa u snem thymmai 2025, ka Seng Samla Mission Compound Shillong ka la pynlong ïa ka taïew lehkmen kaba la sdang naduh ka 13 tarik haduh 18 tarik u kyllalyngkot, 2025, ha kaba ka seng samla ka la pynlong ïa ka lympung jingïakob bapher bapher bad ban pynlong ruh ïa ka jingsam khusnam ïa ki nongjop
Ha kane ka sngi ba khatduh jong ka jinglehkmen la ïadonlang da u MLA ka North Shillong u Bah Adelbert Nongrum kum u kongsan, u MDC ka Khasi Hills Autonomous District Council (KHADC) u Bah PN Syiem, kum u symbud kongsan, U Rangbah Shnong bad kiwei kiwei.
Ha kane ka sngi haba ai jingkren u Bah Adelbert u la pynkynmaw ïa ka jinglong ki mynshuwa ba kim treh ban ïapeiñ bad ka jingtyrwa ka sorkar Phareng ha shuwa ba kan mih na ka jylla bad ban dawa ïa ka sorkar ban mih kumba ka wan khlem wanrah kano kano ka jingkylla ha ka riti dustur u Khasi.
U la ong ba ki aiñ ki long kiba donkam hapoh ka District Council, bad balei donkam ban ïakhih tylli lang bad ki nongmihkhmat hapoh Assembly ba kumno ban weng noh ïa ka para 12 (a) kaba pynwit ïa ka jingtreikam jong ka District Council, kane ka long na ka daw ka jingleh klet na kawei ka samoi sha kawei pat ka samoi treikam.
“Ngi pan ïa kaei kaba ngim ngim don ha kti, ngi klet noh pat kaei kaba ngi la don ha ka kti, kaei kaba ngin pynbha, pynkhlaiñ,” u la ong ba kata ka long kaba donkam hapoh District Council.
“Ka jaitbynriew jong ngi ka tlot, namar ba ngim don ki aiñ, ka aiñ ka long kaba donkam haba kum kine ki por. Ngi kum ka jaitbynriew watla ngi long tang shitroh, hynrei sngewkmen pat ba ngi don ïa ka thong, kata ka dei ba ngin pynskhem ïa ka jinglong kawei, ban ym shah ïa kiwei ban wan ban pha ria ïa ka jaitbynriew ka jong ngi,” la ong u bah Adelbert Nongrum.
