Na ka bynta ka Jingïaseng KJP Synod ha Sakwang ha u snem 2025
7 klur pynbna u Symbud Myntri Rangbah ka Jylla
Mawkyrwat, K’lyngkot 09: U Symbud Myntri Rangbah ka Jylla Meghalaya, u bah Prestone Tyngsong mynta ka sngi u la ïoh ban ïa kynduh ïa ki nongïalam Balang ba kynthup naduh ki Pastor bad ki Tymmen Basan jong ka Balang Presbyterian Sakwang, South West Khasi Hills District bad kane ka leit ba ïa kynduh ka long kum shibynta jong ka jingpynkhreh ïa ka Jingïaseng K.J.P. Synod Sepngi ka ban sa long ha u snem 2025.
Lah ban kdew ruh ba ha kane ka jingïakynduh ka long na ka bynta ban pynbit pynbiang ïa ki jingdonkam jong katei ka Balang ha kiba bun ki bynta kata naduh ki lynti ki synkin bad ki surok khnang ba ka jingïaseng kan long kaba ïaid beit ïaid ryntih ha ki liang baroh.
Halor kine ki bynta, na ka liang u Symbud Myntri Rangbah ka Jylla Meghalaya, u bah Prestone Tyngsong u la ong ba na ka liang ka Balang Presbyterian Sakwang ha ryngkat bad ki bor jong ka shnong Sakwang ki la dep ban ai ïa ka Dorkhas (memorandum) ha kine ki snem 2019 ban pyntip ïa ki jingdonkam ban pynbiang ïa ki surok hapoh shnong. Namarkata, khlem da pynslem u bah Prestone u la kular ban ai kumba T. 7 klur tam na ka bynta ka 3 kilometer tam ban shna ïa ka surok bad ïa kane shen ynsa pymih noh ïa ka mang tyngka bad ban khot ïa ka tender pat kan long ynda la dep ïa ka kam ban jied ïa ki nongmihkhmat jong ka Jylla Meghalaya.
Ha kane ka sngi la pynïaid ïa ka jingïalang da u Rev. B.K. Syiemlieh bad bud ka jingkren na u bah H.S. Diengdoh, ka jingkhublei na u T.Bn. B. Wartde ha ryngkat da ka jingïadonlang ruh ki rangbah shnong ki dkhot jong ka Balang Presbyterian Sakwang ki Pastor bad ki Tymmen Basan bad ki paidbah ki ba la wan sakhie lang ha kane ka sngi.